ലിസ്റ്റ് എ ക്രിക്കറ്റിലെ രണ്ടാമത്തെ വേഗതയേറിയ സെഞ്ച്വറിയുമായി ഇഷാൻ കിഷാൻ

സെയ്ദ് മുഷ്താഖ് അലി ട്രോഫിയിൽ ജാർഖണ്ഡിന് കിരീടം നേടിക്കൊടുത്ത പ്രകടനത്തിന് പിന്നാലെ,വീണ്ടും റെക്കോർഡ് പ്രകടനവുമായി ഇഷാൻ കിഷാൻ. അഹമ്മദാബാദിൽ നടന്ന വിജയ് ഹസാരെ ട്രോഫി ഉദ്ഘാടന മത്സരത്തിൽ കർണാടകയ്‌ക്കെതിരെ 33 പന്തിൽ സെഞ്ച്വറി അടിച്ചുകൊണ്ട് കിഷാൻ ക്രിക്കറ്റ് ലോകത്തെ ഞെട്ടിച്ചു. ഈ നേട്ടത്തോടെ ഇഷാൻ കിഷാൻ ഇന്ത്യക്കാരിൽ രണ്ടാമത്തെ വേഗതയേറിയ ലിസ്റ്റ് എ സെഞ്ച്വറിയുടെ ഉടമയായി. സാകിബുൽ ഗാനി മാത്രമാണ് കിഷാനേക്കാൾ വേഗത്തിൽ ഈ നേട്ടം കൈവരിച്ചിട്ടുള്ളത്.

Also read: ചരിത്രം കുറിച്ച് ഇഷാൻ കിഷൻ: സെയ്ദ് മുഷ്താഖ് അലി ട്രോഫി ആദ്യമായി ജാർഖണ്ഡിന്

അഹമ്മദാബാദിലെ മത്സരത്തിൽ ആറാം നമ്പറിൽ ബാറ്റിംഗിനിറങ്ങിയ കിഷാൻ, 38-ാം ഓവറിൽ കുമാർ കുഷാഗ്രയുടെ വിക്കറ്റ് വീണതിന് പിന്നാലെയാണ് ക്രീസിലെത്തിയത്. തുടർന്ന് വെറും 20 പന്തിൽ അർദ്ധസെഞ്ച്വറിയിലേക്കെത്തിയ കിഷാൻ, ഏഴ് ഫോറുകളും 14 സിക്‌സുകളും ഉൾപ്പെടെ 39 പന്തിൽ 125 റൺസ് അടിച്ചു. ജാർഖണ്ഡ് 8 വിക്കറ്റിന് 412 റൺസ് എന്ന കൂറ്റൻ സ്കോർ നേടി.

ന്യൂസിലാൻഡിനെതിരായ ടി20 പരമ്പരയ്ക്കും അടുത്ത മാസം നടക്കുന്ന ലോകകപ്പിനുമുള്ള ഇന്ത്യൻ ടീമിലേക്ക് തിരിച്ചെത്തിയ കിഷാന്റെ ഈ പ്രകടനം, അദ്ദേഹത്തിന്റെ മികച്ച ഫോം വീണ്ടും ഉറപ്പിക്കുന്നതായിരുന്നു.