വിജയ് ഹസാരെ ട്രോഫിയിൽ ത്രിപുരയെ തകർത്ത് കേരളം

വിജയ് ഹസാരെ ട്രോഫിയിൽ കേരളത്തിന് വമ്പൻ ജയം. ത്രിപുരയെ 145 റൺസിന് തകർത്ത് കേരളം ടൂർണമെന്റിൽ ശക്തമായ സാന്നിധ്യം അറിയിച്ചു. ആദ്യം ബാറ്റ് ചെയ്ത കേരളം നിശ്ചിത ഓവറുകളിൽ എട്ടു വിക്കറ്റ് നഷ്ടത്തിൽ 348 റൺസ് എന്ന ശക്തമായ നിലയിൽ എത്തി. വിഷ്ണു വിനോദ് സെഞ്ച്വറി നേടിയപ്പോൾ നായകൻ രോഹൻ കുന്നുമ്മൽ 94 റൺസ് എടുത്തു. ബാബ അപരാജിത് അർധശതകം തികച്ചു.

Also Read: വിജയ് ഹസാരെ ട്രോഫി: രോഹിത് ശർമയുടെ തകർപ്പൻ സെഞ്ചുറിയുടെ മികവിൽ മുംബൈക്ക് ജയം

മറുപടി ബാറ്റിംഗിനിറങ്ങിയ ത്രിപുരയ്ക്ക് കേരള ബൗളർമാരുടെ പ്രകടനത്തിന് മുന്നിൽ പിടിച്ചുനിൽക്കാൻ കഴിഞ്ഞില്ല. അഞ്ചു വിക്കറ്റ് നേടിയ അപരാജിത്തും കൂട്ടരും ത്രിപുരയെ 203 റൺസിന് പുറത്താക്കി. സഞ്ജു സാംസൺ ഈ മത്സരത്തിൽ കളത്തിലിറങ്ങിയില്ല. അദ്ദേഹത്തിന് പകരമായി അഭിഷേക് ജെ നായർ ലിസ്റ്റ് എ ക്രിക്കറ്റിൽ അരങ്ങേറ്റം നടത്തി 21 റൺസ് നേടി.

Also Read: വിജയ് ഹസാരെ ട്രോഫി: സച്ചിന്റെ റെക്കോർഡ് പഴങ്കഥയാക്കി കോഹ്ലി

അതേസമയം, സ്പിന്നർ വിഗ്നേഷ് പുത്തൂർക്കും ലിസ്റ്റ് എ അരങ്ങേറ്റ മത്സരമായിരുന്നു ഇത്. അവസരം പൂർണമായി ഉപയോഗിച്ച പുത്തൂർ ഒരു വിക്കറ്റ് നേടി മികച്ച തുടക്കമാണ് കുറിച്ചത്. അടുത്തിടെ നടന്ന ഐപിഎൽ ലേലത്തിൽ രാജസ്ഥാൻ റോയൽസ് ടീമിൽ ഉൾപ്പെട്ട വിഗ്നേഷ് പുത്തൂർ, കഴിഞ്ഞ മാസം നടന്ന സയ്യദ് മുഷ്താഖ് അലി ട്രോഫിയിൽ കേരളത്തിനായി ടി20 അരങ്ങേറ്റവും നടത്തിയിരുന്നു. വമ്പൻ ജയത്തോടെ കേരളം ടൂർണമെന്റിൽ പങ്കെടുക്കുന്ന മറ്റു ടീമുകൾക്ക് ശക്തമായ സന്ദേശം നൽകി കഴിഞ്ഞു. കേരളത്തിന്റെ അടുത്ത മത്സരം ഛത്തീസ്ഗഢിനെതിരാണ്.