ഐസിസി ടി20 ലോകകപ്പിനുള്ള ഒരുക്കങ്ങളുടെ ഭാഗമായി മുൻ സൂപ്പർതാരം ലസിത് മലിംഗയെ ഫാസ്റ്റ് ബൗളിംഗ് കൺസൾട്ടന്റായി ശ്രീലങ്ക ക്രിക്കറ്റ് നിയമിച്ചു. ജനുവരി 25 വരെ ഉള്ള ഹ്രസ്വകാല കരാറിലാണ് മലിംഗ ദേശീയ ടീമിനൊപ്പം പ്രവർത്തിക്കുക. ഫെബ്രുവരിയിൽ ആരംഭിക്കുന്ന ടി20 ലോകകപ്പിന് മുന്നോടിയായി ശ്രീലങ്കൻ ഫാസ്റ്റ് ബൗളർമാരെ പരിശീലിപ്പിക്കുന്നതാണ് മലിംഗയുടെ പ്രധാന ചുമതല. ഇന്ത്യയ്ക്കൊപ്പം ടൂർണമെന്റ് സഹ-ആയോജകരായ ശ്രീലങ്ക, 2012ലെ ടി20 ലോകകപ്പിനും വേദിയൊരുക്കിയിരുന്നു.
വൈറ്റ്-ബോൾ ക്രിക്കറ്റിലെ തന്റെ തലമുറയിലെ ഏറ്റവും മികച്ച ബൗളർമാരിലൊരാളായി കണക്കാക്കപ്പെടുന്ന മലിംഗ അന്താരാഷ്ട്ര ക്രിക്കറ്റിൽ 500ലേറെ വിക്കറ്റുകൾ സ്വന്തമാക്കിയിട്ടുണ്ട്. 2014ൽ ബംഗ്ലാദേശിൽ നടന്ന ടി20 ലോകകപ്പിൽ ശ്രീലങ്കയെ കിരീടത്തിലേക്ക് നയിച്ച ക്യാപ്റ്റനും ആയിരുന്നു അദ്ദേഹം. ഐപിഎല്ലിൽ മുംബൈ ഇന്ത്യൻസ് ടീമിനൊപ്പം നിരവധി കിരീടനേട്ടങ്ങളിലും മലിംഗ നിർണായക പങ്കുവഹിച്ചു.
“അവസാന ഓവറുകളിലെ ബൗളിംഗിൽ മലിംഗയ്ക്കുള്ള അപാരമായ പരിചയവും വൈദഗ്ധ്യവും ലോകകപ്പ് തയ്യാറെടുപ്പുകൾക്ക് വലിയ സഹായമാകും,” എന്ന് ശ്രീലങ്ക ക്രിക്കറ്റ് പ്രസ്താവനയിൽ അറിയിച്ചു. ടൂർണമെന്റിന്റെ രണ്ടാം ദിനം കൊളംബോയിൽ അയർലണ്ടിനെതിരെയാണ് ശ്രീലങ്കയുടെ ആദ്യ മത്സരം. ഓസ്ട്രേലിയ, സിംബാബ്വെ, ഒമാൻ എന്നിവരാണ് ഗ്രൂപ്പിലെ മറ്റു ടീമുകൾ. മലിംഗയുടെ സാന്നിധ്യം ടീമിന്റെ പ്രതീക്ഷകൾ ഉയർത്തിയിട്ടുണ്ട്.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
