ഇന്ത്യ ജയിക്കണം; വ്യക്തിഗത നേട്ടത്തേക്കാൾ ടീമിന്‍റെ പ്രകടനമാണ് പ്രധാനമെന്ന് സൂര്യകുമാർ യാദവ്

മുംബൈ: വ്യക്തിഗത നേട്ടത്തേക്കാൾ ടീമിന്‍റെ പ്രകടനമാണ് പ്രധാനമെന്ന് ഇന്ത്യയുടെ ടി20 ടീം ക്യാപ്റ്റൻ സൂര്യകുമാർ യാദവ്. ന്യൂസിലാൻഡിനെതിരായ ആദ്യ ടി20 മത്സരത്തിന് മുന്നോടിയായി മാധ്യമങ്ങളോട് സംസാരിക്കുകയായിരുന്നു അദ്ദേഹം. ക്രിക്കറ്റ് ഒരു ടീം ഗെയിമാണെന്നും ടേബിൾ ടെന്നീസോ ലോൺ ടെന്നീസോ പോലുള്ള വ്യക്തിഗത കായിക വിനോദമല്ലെന്നും സൂര്യകുമാർ പറഞ്ഞു. വ്യക്തിഗത നേട്ടങ്ങളെക്കാളും തനിക്ക് നേടാൻ കഴിയുന്ന നാഴികക്കല്ലുകളേക്കാളും ടീമിന്റെ പ്രകടനം വളരെ പ്രധാനമാണെന്ന് അദ്ദേഹം പറഞ്ഞു.

കാപ്റ്റൻസിയുടെ സമ്മർദ്ദം തന്റെ ബാറ്റിംഗ് പ്രകടനത്തെ ബാധിക്കുന്നുണ്ടോ എന്ന ചോദ്യത്തിന് ക്യാപ്റ്റനായതിന് ശേഷമുള്ള ആദ്യ കുറച്ച് മത്സരങ്ങളിൽ താൻ ധാരാളം റൺസ് നേടിയിട്ടുണ്ടെന്ന് സൂര്യകുമാർ യാദവ് പറഞ്ഞു. ന്യൂസിലൻഡിനെതിരായ ആദ്യ ടി20 മത്സരത്തിൽ താൻ ഫോം കണ്ടെത്തുമെന്ന പ്രതീക്ഷയും അദ്ദേഹം പ്രകടിപ്പിച്ചു.

ടി20യിൽ ബാറ്റിംഗിൽ സൂര്യകുമാർ യാദവ് മോശം അവസ്ഥയിലൂടെയാണ് കടന്നുപോകുന്നത്, കുറച്ചുനാളായി വലിയ ഇന്നിംഗ്സുകൾ കളിക്കുന്നതിൽ ഇന്ത്യൻ ക്യാപ്റ്റൻ പരാജയപ്പെടുന്നു. ബാറ്റിങ്ങിൽ തിളങ്ങാനാകില്ലെങ്കിലും, ടീം വിജയിക്കുന്നത് കാണുമ്പോൾ സന്തോഷമുണ്ടെന്ന് ഇന്ത്യൻ ടി20 ഐ ക്യാപ്റ്റൻ പറഞ്ഞു.

Also Read- അങ്ങനെ എളുപ്പം തോൽപ്പിക്കാൻ കഴിയുന്ന ടീമല്ല ഇന്ത്യയെന്ന് ന്യൂസിലാൻഡ് താരം

2025-ൽ സൂര്യകുമാറിന് 19 ഇന്നിംഗ്‌സുകളിൽ നിന്ന് 13.62 ശരാശരിയിലും 123.16 സ്ട്രൈക്ക് റേറ്റിലും 218 റൺസ് മാത്രമേ നേടാൻ കഴിഞ്ഞുള്ളൂ. ഒരു അർദ്ധസെഞ്ച്വറി പോലും നേടാൻ അദ്ദേഹത്തിന് കഴിഞ്ഞില്ല.

2024 ജൂണിൽ ഇന്ത്യൻ ടി20 ടീമിന്റെ നായകസ്ഥാനം സൂര്യകുമാർ ഏറ്റെടുത്തതിനുശേഷം, ടീം ഒരു പരമ്പര പോലും തോറ്റിട്ടില്ല. ഏറ്റവും ഒടുവിൽ അഞ്ച് മത്സരങ്ങളുള്ള പരമ്പരയിൽ ദക്ഷിണാഫ്രിക്കയെ 3-1ന് തകർത്തു.