വിജയ് ഹസാരെ ട്രോഫി: പുതുച്ചേരിയെ എട്ടു വിക്കറ്റുകൾക്ക് തകർത്ത് കേരളം

വിജയ് ഹസാരെ ട്രോഫിയിൽ പുതുച്ചേരിക്കെതിരെ കേരളം മിന്നുന്ന ജയം സ്വന്തമാക്കി. എലിറ്റ് ഗ്രൂപ്പ് എയിലെ ആറാം റൗണ്ട് മത്സരത്തിൽ പുതുച്ചേരിയെ എട്ട് വിക്കറ്റിന് തകർത്താണ് കേരളം സീസണിലെ നാലാം ജയം രേഖപ്പെടുത്തിയത്. അഹമ്മദാബാദിലെ നരേന്ദ്ര മോദി സ്റ്റേഡിയം എ ഗ്രൗണ്ടിൽ നടന്ന മത്സരത്തിൽ വിഷ്ണു വിനോദിന്റെ അവിസ്മരണീയമായ ബാറ്റിംഗ് പ്രകടനമാണ് കേരളത്തിന്റെ വിജയത്തിന് അടിസ്ഥാനം.

84 പന്തുകളിൽ നിന്ന് പുറത്താകാതെ 162 റൺസ് നേടിയ വിഷ്ണു വിനോദ് മത്സരത്തിന്റെ പൂർണ നിയന്ത്രണം കൈവശപ്പെടുത്തി. തന്റെ ഇന്നിംഗ്സിൽ 14 സിക്‌സുകൾ അടിച്ച അദ്ദേഹം പുതുച്ചേരി ബൗളിംഗ് നിരയെ അക്ഷരാർത്ഥത്തിൽ തകർത്തെറിഞ്ഞു. തുടക്കത്തിൽ ഓപ്പണർമാരായ സഞ്ജു സാംസണിനെയും നായകൻ രോഹൻ കുന്നുമ്മലിനെയും ചെറിയ സ്കോറിന് നഷ്ടമായെങ്കിലും പിന്നീട് കേരളത്തിന് തിരിഞ്ഞു നോക്കേണ്ടി വന്നില്ല.

Also Read: റെക്കോർഡുകൾ തിരുത്തി കേരളത്തിൻെറ വിഷ്ണു വിനോദ്

248 റൺസെന്ന ലക്ഷ്യം കേരളം വെറും 29 ഓവറിൽ മറികടന്നു. വിഷ്ണു വിനോദും ബാബാ അപരാജിതും ചേർന്ന് മൂന്നാം വിക്കറ്റിൽ 222 റൺസുകളുടെ അപരാജിത കൂട്ടുകെട്ട് തീർത്ത് കേരളത്തെ അനായാസ വിജയത്തിലേക്ക് നയിച്ചു. ആക്രമണാത്മകവും ആത്മവിശ്വാസപരവുമായ ബാറ്റിംഗാണ് കേരളത്തിന്റെ റൺചേസ് അനായാസമാക്കിയത്.

Also Read: വിജയ് ഹസാരെ ട്രോഫി: പുതുച്ചേരിക്കെതിരെ കേരളത്തിന് ജയിക്കാൻ 248 റൺസ് വേണം

ഈ വിജയത്തോടെ കേരളം പോയിന്റ് പട്ടികയിൽ നില മെച്ചപ്പെടുത്തി, ടൂർണമെന്റിൽ ശക്തമായ മുന്നേറ്റം തുടരുകയാണ്. വിഷ്ണു വിനോദിന്റെ ഫോം കേരള ക്യാമ്പിന് വലിയ ആത്മവിശ്വാസം നൽകുന്ന ഘടകമായി മാറിയിട്ടുണ്ട്. നേരത്തെ ടോസ് നേടി ബൗളിംഗ് തിരഞ്ഞെടുത്ത കേരളം  47.4 ഓവറിൽ 247 റൺസിന് അയൽക്കാരെ കേരളം പുറത്താക്കി. കേരളത്തിനായി എംഡി നിധീഷ് നാല് വിക്കറ്റുകൾ വീഴ്ത്തിയപ്പോൾ ഈഡൻ ആപ്പിൾ ടോമും അങ്കിത് ശർമയും രണ്ടു വിക്കറ്റുകൾ വീതം വീഴ്ത്തി.