തദ്ദേശഭരണത്തിലെ ടെക്‌നോളജി വിപ്ലവത്തിന്റെ അമരക്കാരൻ: ‘എം ബി രാജേഷ്’ എന്ന നേതാവിന്റെ ജൈത്രയാത്ര

രണ്ടാം പിണറായി സർക്കാറിലെ തദ്ദേശ സ്വയംഭരണ, എക്സൈസ് വകുപ്പ് മന്ത്രിയായാണ് എം. ബി. രാജേഷ് സേവനമനുഷ്ടിച്ചത്. വിദ്യാർത്ഥി-യുവജന പ്രസ്ഥാനങ്ങളിലൂടെ പൊതുരംഗത്തെത്തിയ അദ്ദേഹം, ഇന്ന് കേരളത്തിലെ തന്നെ ഇടതുപക്ഷ പ്രസ്ഥാനത്തിലെ ശ്രദ്ധേയനായ മുഖമാണ്. 1971 മാർച്ച് 12-ന് പാലക്കാട് ജില്ലയിലെ ചാലശ്ശേരിയിൽ ബാലകൃഷ്ണൻ നായരുടെയും എം. കെ. രമണിയുടെയും മകനായി ജനിച്ച അദ്ദേഹം, നിയമബിരുദവും സാമ്പത്തിക ശാസ്ത്രത്തിൽ ബിരുദാനന്തര ബിരുദവും പൂർത്തിയാക്കി.

എസ്.എഫ്.ഐയുടെ സജീവ പ്രവർത്തകനായി രാഷ്ട്രീയ ജീവിതം ആരംഭിച്ച അദ്ദേഹം, ഡി.വൈ.എഫ്.ഐയുടെ അഖിലേന്ത്യാ പ്രസിഡന്റ്, സംസ്ഥാന സെക്രട്ടറി തുടങ്ങിയ പദവികൾ വഹിച്ചിട്ടുണ്ട്. 2009ലും 2014ലും പാലക്കാട് ലോക്സഭാ മണ്ഡലത്തിൽ നിന്ന് വിജയിച്ച് പാർലമെന്റിലെത്തിയ അദ്ദേഹം, ദേശീയ രാഷ്ട്രീയത്തിലെ വിഷയങ്ങളിൽ നടത്തിയ ഇടപെടലുകളിലൂടെയും പ്രസംഗങ്ങളിലൂടെയും ശ്രദ്ധിക്കപ്പെട്ടു.

ALSO READ: രാഷ്ട്രീയ പാപ്പരത്തം മറയ്ക്കാൻ അധിക്ഷേപവും വ്യക്തിഹത്യയും ആയുധമാക്കുന്ന യുഡിഎഫ്

2021ലെ നിയമസഭാ തെരഞ്ഞെടുപ്പിൽ പാലക്കാട് ജില്ലയിലെ തൃത്താലയിൽ നിന്ന് വിജയിച്ച അദ്ദേഹം, കേരള നിയമസഭയുടെ സ്പീക്കറായി തെരഞ്ഞെടുക്കപ്പെട്ടു. സഭാനടപടികൾ മാതൃകാപരമായി നിയന്ത്രിക്കുന്നതിൽ പ്രശംസ പിടിച്ചുപറ്റി. പിന്നീട് 2022ൽ എം വി ഗോവിന്ദൻ മാസ്റ്റർ സി പി ഐ എം സംസ്ഥാന സെക്രട്ടറിയായി തെരഞ്ഞെടുക്കപ്പെട്ടതിനു പിന്നാലെ മന്ത്രി സ്ഥാനം രാജിവെച്ച ഒഴിവിലേക്ക് സ്പീക്കറായിരുന്ന എം ബി രാജേഷ് തദ്ദേശ സ്വയംഭരണ, എക്സൈസ് വകുപ്പ് മന്ത്രിയായി ചുമതലയേറ്റു.

മന്ത്രി എന്ന നിലയിൽ കേരളത്തിലെ തദ്ദേശ സ്ഥാപനങ്ങളുടെ ഡിജിറ്റലൈസേഷൻ, മാലിന്യ നിർമ്മാർജ്ജനത്തിനായുള്ള ‘മാലിന്യമുക്തം നവകേരളം’ പദ്ധതി തുടങ്ങിയവയ്ക്ക് അദ്ദേഹം വലിയ പ്രാധാന്യം നൽകി. മികച്ച രാഷ്ട്രീയ-സാമൂഹിക നേതാവ് എന്നതിലുപരി അദ്ദേഹം നിരവധി പുസ്തകങ്ങളും ലേഖനങ്ങളും രചിച്ചിട്ടുണ്ട്. ‘ചരിത്രവും വർത്തമാനവും’, ‘ആഗോളവൽക്കരണ കാലത്തെ പ്രണയവും കലഹവും’ തുടങ്ങിയവ അദ്ദേഹത്തിന്റെ പ്രധാന കൃതികളിൽ ചിലതാണ്.

​പ്രധാന പദ്ധതികൾ

​മാലിന്യമുക്തം നവകേരളം: കേരളത്തെ സമ്പൂർണ്ണ മാലിന്യമുക്തമാക്കുക എന്ന ലക്ഷ്യത്തോടെയുള്ള ബൃഹത്തായ ക്യാമ്പയിൻ. ഉറവിട മാലിന്യ സംസ്കരണം, ഹരിതകർമ്മ സേനയുടെ പ്രവർത്തനം എന്നിവ ഇതിന്റെ ഭാഗമാണ്.

​കെ-സ്മാർട്ട്: തദ്ദേശ സ്ഥാപനങ്ങളിലെ എല്ലാ സേവനങ്ങളും (ജനന-മരണ രജിസ്ട്രേഷൻ, ബിൽഡിംഗ് പെർമിറ്റ് തുടങ്ങിയവ) ഓൺലൈനായി ലഭ്യമാക്കുന്ന ഏകീകൃത സോഫ്റ്റ്‌വെയർ സംവിധാനം.

അതിദാരിദ്ര നിർമ്മാർജ്ജനം: കേരളത്തിലെ അതിദരിദ്രരായ കുടുംബങ്ങളെ കണ്ടെത്തി അവരെ ജീവിതത്തിന്റെ മുഖ്യധാരയിലേക്ക് കൊണ്ടുവരാനുള്ള പദ്ധതിക്ക് തദ്ദേശ വകുപ്പിലൂടെ അദ്ദേഹം നേതൃത്വം നൽകി.