ബ്യൂട്ടി, മേക്കപ്പ് വീഡിയോകൾ ചെയ്ത് ടിക്ടോക്കിൽ താരമായി മാറിയ മെക്സിക്കോ സ്വദേശി വലേറിയ മാർക്കേസ് (23) ലൈവ്സ്ട്രീമിങ്ങിനിടെ അക്രമിയുടെ വെടിയേറ്റു മരിച്ചു. സമ്മാനം കൈമാറാനെന്ന വ്യാജേന എത്തിയ ആളാണ് വെടിവെച്ചത്. ജെലിസ്കോയിലുള്ള ബ്യൂട്ടി സലൂണിൽ ചൊവ്വാഴ്ച ലൈവ്സ്ട്രീമിങ് നടത്തുമ്പോഴാണ് ബൈക്കിലെത്തിയ അക്രമി വെടിയുതിർത്തത്. ടിക് ടോക്കിലും ഇൻസ്റ്റാഗ്രാമിലും ഏകദേശം 200,000 ഫോളോവേഴ്സ് ഉണ്ടായിരുന്ന വലേറിയയുടെ നെഞ്ചിലും തലയിലുമാണ് വെടിയേറ്റത്.
മരണത്തിന് മണിക്കൂറുകൾക്ക് മുമ്പ്, സലൂണിൽ പോസ് ചെയ്ത ഒരു സെൽഫി അവർ ഇൻസ്റ്റാഗ്രാം സ്റ്റോറിയിൽ പങ്കുവെച്ചിരുന്നു. ഒരു സമ്മാനം നൽകുന്നതായി നടിച്ച് മോട്ടോർ സൈക്കിളിൽ ആണ് കൊലയാളി എത്തിയത്. എന്നാൽ പാക്കേജ് കൈമാറുന്നതിനുപകരം, അയാൾ തോക്ക് പുറത്തെടുത്ത് വെടിവയ്ക്കുകയായിരുന്നു. വെടിയേറ്റ് വലേറിയ കസേരയിൽനിന്നു വീണപ്പോഴേക്കും ഫോൺ ഒരാൾ കൈക്കലാക്കി ലൈവ്സ്ട്രീമിങ് നിർത്തി. സ്ത്രീഹത്യ കേസുകൾ ആശങ്കാജനകമാം വിധം ഉയർന്ന നിലയിൽ തുടരുന്ന ജാലിസ്കോയിൽ സ്ത്രീകൾക്കെതിരായ അതിക്രമങ്ങൾ വർദ്ധിച്ചുവരുന്നതിനെ ഈ സംഭവം എടുത്തുകാണിക്കുന്നു. സ്ത്രീകൾക്കെതിരെയുള്ള അതിക്രമങ്ങളുടെ ഉയർന്ന നിരക്കുള്ള രാജ്യമാണ് മെക്സിക്കോ.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
