രാജസ്ഥാനിലെ ചുട്ടുപൊള്ളുന്ന മണലാരണ്യത്തിനിടയിൽ മഞ്ഞുമൂടിക്കിടക്കുന്ന ഒരു പ്രദേശം ഉണ്ടെന്ന് പറഞ്ഞാൽ വിശ്വസിക്കുമോ ? അജ്മീറിന് സമീപമുള്ള കിഷൻഗഡ് ഡംപിങ് യാർഡ് ഇന്ന് ലോകമെമ്പാടുമുള്ള സഞ്ചാരികളെ ആകർഷിക്കുന്നത് അതിന്റെ ഈ അപൂർവ്വമായ വെളുത്ത സൗന്ദര്യം കൊണ്ടാണ്. ‘രാജസ്ഥാനിലെ മൂൺലാൻഡ്’ (Moonland Of Rajasthan) എന്ന് വിളിക്കപ്പെടുന്ന ഈ പ്രദേശം ഇൻസ്റ്റാഗ്രാം ഇൻഫ്ലുവൻസർമാരുടെയും ഫോട്ടോഗ്രാഫർമാരുടെയും പ്രിയപ്പെട്ട ഇടമായി മാറിയിരിക്കുന്നു.
യഥാർത്ഥത്തിൽ ഇതൊന്നും പ്രകൃതിദത്തമായി ഉണ്ടായ ‘മഞ്ഞു മലകൾ’ അല്ല. ഇന്ത്യയുടെ ‘മാർബിൾ സിറ്റി’ എന്ന് വിളിക്കപ്പെടുന്ന കിഷൻഗഡിലെ മാർബിൾ വ്യവസായത്തിൽ നിന്നുള്ള അവശിഷ്ടങ്ങൾ (Marble Slurry) വർഷങ്ങളോളം ഒരു സ്ഥലത്ത് നിക്ഷേപിച്ചപ്പോൾ ഉണ്ടായതാണ് ഈ അത്ഭുത കാഴ്ച. ടൺ കണക്കിന് മാർബിൾ പൊടിയും സ്ലറിയും ചേർന്ന് കൃത്രിമമായ വെളുത്ത കുന്നുകൾ രൂപപ്പെട്ടു. ഈ കുന്നുകൾക്കിടയിലെ വിള്ളലുകളിൽ മഴവെള്ളം കെട്ടിക്കിടന്നുണ്ടായ നീല ജലാശയങ്ങൾ ഈ പ്രദേശത്തിന് ഒരു വിദേശ രാജ്യത്തിന്റെ പരിവേഷം നൽകുന്നു. ചില സഞ്ചാരികൾ ഇതിനെ ഇന്ത്യയിലെ ‘മാലിദ്വീപ്’ എന്ന് പോലും വിശേഷിപ്പിക്കാറുണ്ട്.
ബോളിവുഡ് സിനിമകളിലും മ്യൂസിക് വീഡിയോകളിലും കിഷൻഗഡ് ഇന്ന് ഒരു സ്ഥിരം സാന്നിധ്യമാണ്. സൽമാൻ ഖാന്റെ ‘ദബാംഗ് 3’, ടൈഗർ ഷ്രോഫിന്റെ ‘ഭാഗി 3’, ‘തർ’ തുടങ്ങിയ ചിത്രങ്ങളിലെ ഗാനരംഗങ്ങൾ ഇവിടെയാണ് ചിത്രീകരിച്ചിരിക്കുന്നത്. കുറഞ്ഞ ചിലവിൽ മനോഹരമായ ലൊക്കേഷൻ ലഭിക്കുമെന്നത് സിനിമാ പ്രവർത്തകരെയും വെഡിങ് ഫോട്ടോഗ്രാഫർമാരെയും ഇവിടേക്ക് ആകർഷിക്കുന്നു,.
കാഴ്ചയിൽ അതിമനോഹരമാണെങ്കിലും കിഷൻഗഡ് സന്ദർശിക്കുന്നവർ ചില കാര്യങ്ങൾ പ്രത്യേകം ശ്രദ്ധിക്കണം. മാർബിൾ അവശിഷ്ടങ്ങളിൽ നിന്നുള്ള സൂക്ഷ്മമായ പൊടിപടലങ്ങൾ ശ്വാസകോശ സംബന്ധമായ പ്രശ്നങ്ങൾക്ക് കാരണമായേക്കാം. അതിനാൽ സന്ദർശകർ നിർബന്ധമായും മാസ്ക് ധരിക്കേണ്ടതാണ്. കൂടാതെ, ഇവിടുത്തെ നീല ജലാശയങ്ങളിലെ വെള്ളം രാസവസ്തുക്കളാൽ മലിനമായതിനാൽ അവ ചർമ്മരോഗങ്ങൾക്ക് കാരണമായേക്കാം. സെൻട്രൽ യൂണിവേഴ്സിറ്റി ഓഫ് രാജസ്ഥാന്റെ പഠനമനുസരിച്ച്, ഈ പ്രദേശത്തെ ഭൂഗർഭജലത്തിൽ അനുവദനീയമായ അളവിലും പത്തിരട്ടി അധികം മലിനീകരണം (TDS) കണ്ടെത്തിയിട്ടുണ്ട്.
നിങ്ങൾ ഈ വെളുത്ത വിസ്മയം കാണാൻ ആഗ്രഹിക്കുന്നുവെങ്കിൽ, രാവിലെ 11 മണിക്ക് മുൻപോ വൈകുന്നേരം 4 മണിക്ക് ശേഷമോ സന്ദർശിക്കുന്നതാണ് ഉചിതം. വൈകുന്നേരത്തെ അസ്തമയ സൂര്യന്റെ വെളിച്ചത്തിൽ ഇവിടുത്തെ കുന്നുകൾ കൂടുതൽ മനോഹരമായി കാണപ്പെടും. പ്രകൃതിയും വ്യവസായവും തമ്മിലുള്ള ഈ വിചിത്രമായ കൂടിച്ചേരൽ ആസ്വദിക്കുമ്പോൾ തന്നെ പരിസ്ഥിതിയെ ദോഷകരമായി ബാധിക്കാത്ത രീതിയിൽ ഉത്തരവാദിത്തത്തോടെ പെരുമാറാനും സന്ദർശകർ ശ്രദ്ധിക്കണം,.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
