ലോകമെമ്പാടുമുള്ള ദശലക്ഷക്കണക്കിന് ആരാധകരെ മുൾമുനയിൽ നിർത്തിയ ഏതാനും മണിക്കൂറുകൾക്ക് ശേഷം ഇന്ത്യൻ ക്രിക്കറ്റ് താരം വിരാട് കോലിയുടെ ഇൻസ്റ്റാഗ്രാം അക്കൗണ്ട് പുനഃസ്ഥാപിക്കപ്പെട്ടു. ജനുവരി 30-ന് രാത്രി അപ്രതീക്ഷിതമായി അപ്രത്യക്ഷമായ കോലിയുടെ പ്രൊഫൈൽ വെള്ളിയാഴ്ച രാവിലെ 8:30-ഓടെയാണ് വീണ്ടും സജീവമായത്.
കോലിയുടേത് മാത്രമല്ല, അദ്ദേഹത്തിന്റെ സഹോദരൻ വികാസ് കോലിയുടെ ഇൻസ്റ്റാഗ്രാം അക്കൗണ്ടും ഒരേസമയം അപ്രത്യക്ഷമായിരുന്നു. കോലിയുടെ അക്കൗണ്ട് തിരിച്ചുവന്നെങ്കിലും വികാസ് കോലിയുടെ പ്രൊഫൈൽ ഇപ്പോഴും സജീവമായിട്ടില്ല. ഇത് സാങ്കേതിക തകരാറാണോ അതോ മനഃപൂർവ്വം ഡിആക്ടിവേറ്റ് ചെയ്തതാണോ എന്ന കാര്യത്തിൽ ഇൻസ്റ്റാഗ്രാമോ കോലിയുടെ ടീമോ ഇതുവരെ ഔദ്യോഗിക വിശദീകരണം നൽകിയിട്ടില്ല.
ALSO READ: അൽക്കാരാസ് ഓസ്ട്രേലിയൻ ഓപ്പൺ ഫൈനലിൽ; വനിതാ ഫൈനലിൽ സബാലെങ്കയും റിബാക്കിനയും ഏറ്റുമുട്ടും
കോലിയുടെ അക്കൗണ്ട് കാണാതായതോടെ സോഷ്യൽ മീഡിയയിൽ വലിയ ചർച്ചകളാണ് നടന്നത്. ആശങ്കയിലായ ആരാധകർ കോലിയുടെ ഭാര്യയും നടിയുമായ അനുഷ്ക ശർമ്മയുടെ ഇൻസ്റ്റാഗ്രാം പേജിലാണ് പിന്നീട് അഭയം തേടിയത്. “ഭാഭീ, ഭയ്യയുടെ അക്കൗണ്ട് എവിടെപ്പോയി?” എന്ന തരത്തിലുള്ള രസകരമായ കമന്റുകൾ കൊണ്ട് അനുഷ്കയുടെ പോസ്റ്റുകൾ നിറഞ്ഞു.
അതേസമയം, ഇന്റർനെറ്റിൽ തരംഗമായ “മിസ്സിംഗ് പെൻഗ്വിൻ” ട്രെൻഡുമായി കോലിയുടെ തിരോധാനത്തെ ബന്ധിപ്പിച്ച് നിരവധി ട്രോളുകളും മീമുകളും പുറത്തിറങ്ങി. 2026 വിശദീകരിക്കാനാകാത്ത അപ്രത്യക്ഷമാകലുകളുടെ വർഷമാണെന്ന തരത്തിലായിരുന്നു ആരാധകരുടെ തമാശകൾ.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
