പത്ത് വർഷത്തിന് ശേഷം വൈറൽ; ഒറ്റ ദിവസം കൊണ്ട് നിർമ്മാതാവിനെ കോടീശ്വര പട്ടികയിൽ എത്തിച്ച ലബുബു ഡോൾ

‘അഗ്ലി-ക്യൂട്ട്’ എന്ന് വിശേഷിപ്പിക്കുന്ന ലബുബു ഡോൾ ഇപ്പോൾ സോഷ്യൽ മീഡിയയിൽ ആകെ വൈറലാണ്. സെലിബ്രിറ്റികൾക്കിടയിൽ പ്രിയങ്കരനുമായി മാറിക്കൊണ്ടിരിക്കുന്ന ഈ പാവക്കുട്ടി ഫാഷൻ ട്രെൻഡുകളുടെ ഒരു പുതിയ തരംഗത്തിന് തിരികൊളുത്തി. ഇതിലൂടെ ഫോബ്‌സിന്റെ റിയൽ-ടൈം ബില്യണയർ പട്ടിക പ്രകാരം, പോപ്പ് മാർട്ട് ഇന്റർനാഷണൽ ഗ്രൂപ്പിന്റെ സിഇഒ വാങ് നിങ് ഇപ്പോൾ ചൈനയിലെ പത്ത് ധനികരിൽ ഒരാളായി മാറിയിരിക്കുകയാണ്.

ഹോങ്കോംഗ് കലാകാരനായ കാസിംഗ് ലാങ് ആണ് ലബുബു പാവക്കുട്ടികളെ നിർമ്മിച്ചത്. ഈ പാവകൾ ആദ്യമായി വിപണിയിലെത്തുന്നത് 2015 ലാണ്. ചൈനീസ് കളിപ്പാട്ട ഭീമനായ പോപ്പ് മാർട്ടുമായുള്ള സഹകരണത്തിനുശേഷമാണ് 2019ൽ ലബുബു പാവകളുടെ വിൽപ്പന കുതിച്ചുയർന്നത്. പോപ്പ് മാർട്ടിന്റെ വളർച്ചയ്ക്ക് ലബുബു പാവകൾ നിർവഹിച്ച പങ്ക് ചെറുതല്ല. 2024-ൽ കമ്പനിയുടെ നെറ്റ് പ്രോഫിറ്റ് 188 ശതമാനം വർധിച്ചതായും മൊത്തം വിൽപ്പന മുൻ വർഷത്തേക്കാൾ ഇരട്ടിയിലധികം വർദ്ധിച്ച് ഏകദേശം 13 ബില്യൺ യുവാൻ (ഏകദേശം 1.8 ബില്യൺ ഡോളർ) എത്തിയതായും റിപ്പോർട്ട് പറയുന്നു.

Also read – ഇന്ത്യക്കാരെ ഐസ്‌ക്രീം ‘കുടിപ്പിച്ച് കിടത്താൻ’ വാറൻ ബഫറ്റെത്തുന്നു; ലക്ഷ്യം 45000 കോടി മൂല്യമുള്ള ഇന്ത്യൻ വിപണി

20 മുതൽ 30 ഡോളർ വരെ വിലയുള്ള ലബുബു പാവകളെ “ബ്ലൈൻഡ് ബോക്സ് രീതിയിലാണ് വിൽക്കുന്നത്. അൺബോക്സിംഗ് ചെയ്തതിനുശേഷം മാത്രമേ ഈ രീതിയിൽ വാങ്ങുന്നവർക്ക് ഏത് ഡിസൈൻ ലഭിച്ചുവെന്ന് കണ്ടെത്താനാകൂ. ഇതിനൊരു സർപ്രൈസ് എലമെന്റ് ഉള്ളത് കൊണ്ട് തന്നെ ടിക് ടോക്ക്, ഇൻസ്റ്റാഗ്രാം പോലുള്ള സോഷ്യൽ മീഡിയ പ്ലാറ്റ്‌ഫോമുകളിൽ ഈ ബ്ലൈൻഡ് ബോക്സ് ട്രെൻഡ് വൈറലാവുകയായിരുന്നു.