യുകെ 07 റൈഡർ’ (UK07 Rider) എന്ന പേരിൽ പ്രശസ്തനായ മോട്ടോ വ്ലോഗറും ബിഗ് ബോസ് മുൻ മത്സരാർത്ഥിയുമായ അനുരാഗ് ഡോബാൽ ആത്മഹത്യയ്ക്ക് ശ്രമിച്ചു. അതിവേഗത്തിൽ കാർ ഓടിച്ച് ബാരിയറിലേക്ക് ഇടിച്ചു കയറ്റി അപകടമുണ്ടാക്കി. ശനിയാഴ്ച ഡൽഹി-മീററ്റ് എക്സ്പ്രസ് വേയിൽ 150 കിലോമീറ്ററിലധികം വേഗതയിൽ ടൊയോട്ട ഫോർച്യൂണർ ഓടിക്കുന്നതിനിടെയാണ് അദ്ദേഹം മനഃപൂർവ്വം ഹൈവേയിലെ ബാരിയറുകളിലേക്ക് കാർ ഇടിച്ചു കയറ്റിയത്.
അപകടസമയത്ത് അനുരാഗ് ഇൻസ്റ്റാഗ്രാമിൽ തത്സമയം വീഡിയോ പങ്കുവെക്കുന്നുണ്ടായിരുന്നു. ഏകദേശം 82,000 പേർ ഈ ദൃശ്യങ്ങൾ തത്സമയം കണ്ടുകൊണ്ടിരിക്കെയാണ് അപകടം നടന്നത്. വികാരാധീനനായി കരഞ്ഞുകൊണ്ട് സംസാരിച്ച അനുരാഗ്, തന്റെ അമ്മയുടെ സ്നേഹത്തിന് വേണ്ടിയുള്ള ആഗ്രഹം പ്രകടിപ്പിച്ചു. “അടുത്ത ജന്മത്തിൽ വരുമ്പോൾ എനിക്ക് സ്നേഹം നൽകണം അമ്മേ, എനിക്ക് സ്നേഹം അത്യാവശ്യമായിരുന്നു” എന്ന് അദ്ദേഹം ലൈവിൽ പറഞ്ഞു. “നമുക്ക് അവസാന യാത്രയ്ക്ക് പോകാം” എന്ന് പറഞ്ഞുകൊണ്ട് 150 കി.മീ വേഗതയിൽ വാഹനം ഓടിച്ച അദ്ദേഹം, “ഗുഡ് ബൈ” എന്ന് നിലവിളിച്ചുകൊണ്ട് സ്റ്റിയറിംഗ് വലത്തോട്ട് വെട്ടിച്ച് ബാരിയറുകളിൽ ഇടിക്കുകയായിരുന്നു.
തന്റെ വീട്ടുകാരിൽ നിന്നുള്ള കടുത്ത മാനസിക പീഡനമാണ് ഇത്തരമൊരു നടപടിക്ക് പ്രേരിപ്പിച്ചതെന്ന് അനുരാഗ് ആരോപിച്ചു. മറ്റൊരു ജാതിയിൽപ്പെട്ട പെൺകുട്ടിയെ വിവാഹം കഴിച്ചതിനെത്തുടർന്ന് മാതാപിതാക്കൾ തന്നെ പീഡിപ്പിക്കുകയാണെന്നും തന്നെയും ഭാര്യയെയും വീട്ടിൽ താമസിപ്പിക്കാൻ അവർ തയ്യാറല്ലെന്നും അദ്ദേഹം മുൻപ് പങ്കുവെച്ച വീഡിയോയിൽ പറഞ്ഞിരുന്നു. മാതാപിതാക്കളുടെ പീഡനം കാരണം ഭാര്യ റിതിക തന്നെ വിട്ടുപോയതായും അദ്ദേഹം വെളിപ്പെടുത്തി. “അവസാന സന്ദേശം” (The last message) എന്ന പേരിൽ പങ്കുവെച്ച വീഡിയോയിൽ തന്റെ മരണത്തിന് ഉത്തരവാദികൾ കുടുംബാംഗങ്ങളായിരിക്കുമെന്നും അദ്ദേഹം ആരോപിച്ചിരുന്നു.
അപകടത്തിന് പിന്നാലെ സ്ഥലത്തെത്തിയ പോലീസ് അനുരാഗിനെ മീററ്റിലെ സുഭാരതി ആശുപത്രിയിൽ പ്രവേശിപ്പിച്ചു. അദ്ദേഹത്തിന്റെ നില നിലവിൽ ഗുരുതരമായി തുടരുകയാണ്. അതേസമയം, ആശുപത്രിയിൽ നിന്നുള്ള മറ്റൊരു വീഡിയോയിൽ അദ്ദേഹം സംസാരിക്കുന്ന ദൃശ്യങ്ങൾ പുറത്തുവന്നിട്ടുണ്ട്.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
