വണ്ണം കുറച്ചാൽ മാത്രം ആരോ​ഗ്യമുള്ളവരാകുമോ? എന്താണ് ഫിറ്റ്നസ് എന്നറിയാം

ഇന്നത്തെ തിരക്കേറിയ ജീവിതത്തിൽ, പലരും ഫിറ്റ്നസ് എന്നത് മറ്റുള്ളവയെ പോലെ വേഗത്തിൽ കൈവരിക്കാം എന്ന ഒരു ലക്ഷ്യമായാണ് കാണുന്നത്. തടി കുറയ്ക്കാനോ, ഏതെങ്കിലും വിശേഷ ദിവസത്തിന് വേണ്ടിയോ, അല്ലെങ്കിൽ ഒരു നിശ്ചിത ശരീരഭാരം കൈവരിക്കാനോ മാത്രമായി വ്യായാമം ചെയ്യുന്ന പ്രവണത ഇന്നു വ്യാപകമായി നമുക്ക് കാണാനാകും.

സത്യാവസ്ഥ എന്തെന്ന് വച്ചാൽ, ഫിറ്റ്നസ് എന്നത് ഒരു ഹ്രസ്വകാല ഓട്ടമത്സരമല്ല , മറിച്ച് ജീവിതകാലം മുഴുവൻ തുടരേണ്ട ഒരു മാരത്തോൺ ആണ്. ഇതാണ് ഫിറ്റ്നസ് എന്നതു ഒരു ലക്ഷ്യം ആയി കണക്കാക്കുന്ന ഏവരും മനസിലാക്കേണ്ടത്. ഫിറ്റ്നസിനെ ഒരു ദീർഘകാല ലക്ഷ്യമായി കാണുമ്പോൾ മാത്രമേ അത് നൽകുന്ന യഥാർത്ഥ പ്രയോജനങ്ങൾ നമുക്ക് അനുഭവിച്ചറിയാൻ സാധിക്കൂ.

also read:‘ആരോഗ്യകരമായ തലച്ചോറ്’ സംരക്ഷിക്കാനുള്ള അവസരം എല്ലാവർക്കും ഉറപ്പാക്കാം

​ഫിറ്റ്നസ് എന്തുകൊണ്ട് ദീർഘകാല ലക്ഷ്യമാകണം?

​പെട്ടെന്ന് ഭാരം കുറയ്ക്കുന്ന ക്രാഷ് ഡയറ്റുകളും കഠിനമായ വ്യായാമമുറകളും താൽക്കാലിക ഫലം നൽകിയേക്കാം, എന്നാൽ അവ ദീർഘകാലത്തേക്ക് പിന്തുടരുക പ്രായോഗികമല്ല. തെറ്റായ ഒരു നീക്കം കാരണം നമ്മുടെ ആരോഗ്യം വെല്ലുവിളിക്കപ്പെട്ടേക്കാം. വ്യായാമം അവസാനിപ്പിക്കുന്നതോടെ നഷ്ടപ്പെട്ട ശരീരഭാരം ഇരട്ടിയായി തിരിച്ചെത്താനും ഇത് ഇടയാക്കുന്നു.

​
ആരോഗ്യമുള്ള ഒരു ജീവിതശൈലി രൂപപ്പെടുത്താൻ താഴെ പറയുന്ന മേഖലകളിൽ ശ്രദ്ധ കേന്ദ്രീകരികേണ്ടത് അത്യന്താപേക്ഷികം ആണ്. വ്യായാമം, സന്തുലിതാഹാരം, സ്ഥിരത, ശരിയായ വിശ്രമം എന്നത് നമ്മുടെ ആരോഗ്യം നിലനിർത്തും. ആഴ്ചയിൽ 150 മിനിറ്റ് മിതമായ വ്യായാമം (നടത്തം, നീന്തൽ, സ്ട്രെങ്ത് ട്രെയിനിംഗ്); പ്രോട്ടീൻ, ഫൈബർ, നല്ല കൊഴുപ്പ് എന്നിവയടങ്ങിയ ഭക്ഷണക്രമം; ദിവസവും 20-30 മിനിറ്റ് മാത്രം മാറ്റിവെച്ചാലും അത് സ്ഥിരമായി ചെയ്യുക: ദിവസവും 7-8 മണിക്കൂർ ഉറക്കവും ; ആഴ്ചയിൽ 1-2 ദിവസം വിശ്രമവും എന്നത് ആരോഗ്യമുള്ള ജീവിതശൈലിയിലേക്ക് നമ്മെ നയിക്കുന്നു.

ചെറിയ മാറ്റങ്ങളിലൂടെ വലിയ ലക്ഷ്യങ്ങളിലേക്ക്

​ദീർഘകാല ഫിറ്റ്നസ് കൈവരിക്കാൻ ജീവിതത്തിൽ പെട്ടെന്ന് വലിയ മാറ്റങ്ങൾ വരുത്തേണ്ടതില്ല. അതിനായി ചില ലളിതമായ ശീലങ്ങൾ ആരംഭിക്കാം:

* ​ലിഫ്റ്റിന് പകരം പടികൾ ഉപയോഗിക്കുക – ദൈനംദിന ജീവിതത്തിൽ ശാരീരിക അധ്വാനം കൂട്ടാനുള്ള എളുപ്പവഴിയാണിത്.
* ​ധാരാളം വെള്ളം കുടിക്കുക – ശരീരത്തിലെ വിഷാംശങ്ങൾ പുറന്തള്ളാനും മെറ്റബോളിസം വർദ്ധിപ്പിക്കാനും ആവശ്യത്തിന് വെള്ളം കുടിക്കേണ്ടത് അത്യന്താപേക്ഷിതമാണ്.
* ​പ്രോസസ്സ് ചെയ്ത ഭക്ഷണങ്ങൾ കുറയ്ക്കുക- ജങ്ക് ഫുഡ്, അമിതമായ പഞ്ചസാര, പായ്ക്കറ്റ് ഭക്ഷണങ്ങൾ എന്നിവ ഒഴിവാക്കി വീട്ടിലുണ്ടാക്കുന്ന ആഹാരം ശീലമാക്കുക.

ആരോ​ഗ്യവിദ​​ഗ്ധരുമായി കൂടിക്കാഴ്ച നടത്തിയതിനുശേഷം മാത്രം ഫിറ്റ്നസ് കൈവരിക്കാനുള്ള മുൻകരുതലുകൾ സ്വീകരിക്കാവുന്നതാണ്.