നോയിഡക്ക് പിന്നാലെ ഉത്തരാഖണ്ഡിലും സമരവുമായി തൊഴിലാളികൾ തെരുവിൽ. രുദ്രപ്പൂരിലെ വി-ഗാർഡ് ഇൻഡസ്ട്രീസിലെ തൊഴിലാളികളാണ് വേതന വർധനവ് ആവശ്യപ്പെട്ട് സമരം ചെയ്തത്. എന്നാൽ തൊഴിലാളികളെ പൊലീസ് മർദിച്ചു.
പിന്നാലെ സിഐടിയു സമരം ഏറ്റെടുത്തു. തുടർന്ന സിഐടിയു ജനറൽ സെക്രട്ടറി എളമരം കരീമിന്റെ നേതൃത്വത്തിലുള്ള പ്രതിനിധി സംഘം കളക്ടറേറ്റിൽ എത്തിയെങ്കിലും കളക്ടർ കാണാൻ സമ്മതിച്ചില്ല. ഇതോടെ പ്രതിനിധി സംഘം കളക്ടറേറ്റിൽ ഉപരോധം ആരംഭിച്ചു.
ALSO READ: എഎപി എംപിമാരുടെ ലയനം അംഗീകരിച്ച് രാജ്യസഭാ അധ്യക്ഷൻ
പോരാടുന്ന തൊഴിലാളികൾക്കൊപ്പമാണ് സിഐടിയു എന്ന് സമൂഹ മാധ്യമങ്ങളിൽ പങ്കുവെച്ച കുറിപ്പിൽ നേതൃത്വം വ്യക്തമാക്കി. സിഐടിയു അഖിലേന്ത്യാ ജനറൽ സെക്രട്ടറി എളമരം കരീമിൻ്റെ നേതൃത്വത്തിൽ, സെക്രട്ടറി കെ.എൻ. ഉമേഷ്, ഉത്തരാഖണ്ഡ് സംസ്ഥാന പ്രസിഡൻ്റ് ജഖ്മോള, ജനറൽ സെക്രട്ടറി രാജേന്ദ്ര നേഗി, സെക്രട്ടറി ലേഖ്രാജ് തുടങ്ങിയവരടങ്ങുന്ന സിഐടിയു പ്രതിനിധി സംഘം ഉത്തരാഖണ്ഡിലെ ഉദ്ദം സിംഗ് നഗർ ജില്ലയിലെ രുദ്രപ്പൂർ ഗാന്ധി പാർക്കിൽ സമരം ചെയ്യുന്ന വി-ഗാർഡ് തൊഴിലാളികളെ നേരിൽ കണ്ട് ഐക്യദാർഢ്യം പ്രഖ്യാപിച്ചു.
ഫേസ്ബുക്ക് കുറിപ്പിന്റെ പൂർണരൂപം:
വർഗ സമരം പടരുകയാണ് ; രുദ്രപ്പൂരിലെ വി-ഗാർഡ് (V-Guard) ഇൻഡസ്ട്രീസിലെ പോരാടുന്ന തൊഴിലാളികൾക്കൊപ്പം സിഐടിയു (CITU) പ്രതിനിധി സംഘം.
സിഐടിയു അഖിലേന്ത്യാ ജനറൽ സെക്രട്ടറി സ. എളമരം കരീമിൻ്റെ നേതൃത്വത്തിൽ, സെക്രട്ടറി കെ.എൻ. ഉമേഷ്, ഉത്തരാഖണ്ഡ് സംസ്ഥാന പ്രസിഡൻ്റ് ജഖ്മോള, ജനറൽ സെക്രട്ടറി രാജേന്ദ്ര നേഗി, സെക്രട്ടറി ലേഖ്രാജ് തുടങ്ങിയവരടങ്ങുന്ന സിഐടിയു പ്രതിനിധി സംഘം ഉത്തരാഖണ്ഡിലെ ഉദ്ദം സിംഗ് നഗർ ജില്ലയിലെ രുദ്രപ്പൂർ ഗാന്ധി പാർക്കിൽ സമരം ചെയ്യുന്ന വി-ഗാർഡ് തൊഴിലാളികളെ നേരിൽ കണ്ട് ഐക്യദാർഢ്യം പ്രഖ്യാപിച്ചു.
വി-ഗാർഡിൻ്റെ പ്രധാന ഉൽപ്പാദന കേന്ദ്രമാണ് രുദ്രപ്പൂരിലെ പ്ലാൻ്റ്. സ്റ്റെബിലൈസറുകൾ, ഇൻവെർട്ടറുകൾ, പിസിബികൾ എന്നിവ നിർമ്മിക്കുന്നതിനായുള്ള പ്രത്യേക യൂണിറ്റുകൾ ഇവിടെയുണ്ട്. 2025 അവസാനത്തോടെ ഇന്ത്യയിലെ വോൾട്ടേജ് സ്റ്റെബിലൈസർ വിപണിയിൽ 40-45% വിഹിതവുമായി വി-ഗാർഡ് ഇൻഡസ്ട്രീസ് ഒന്നാമതാണ്. തൊഴിലാളികളെ ചൂഷണം ചെയ്യുന്ന സാഹചര്യമാണ് കമ്പനിയുടെ വൻ ലാഭത്തിന് പിന്നിൽ. രുദ്രപ്പൂർ പ്ലാൻ്റിൽ ആയിരക്കണക്കിന് കരാർ തൊഴിലാളികളുണ്ട് (അവരിൽ ഭൂരിഭാഗവും യുവതികളാണ്), സ്ഥിരം തൊഴിലാളികളാരും തന്നെയില്ല. അടിസ്ഥാന തൊഴിൽ നിയമങ്ങൾ ലംഘിക്കുന്നത് സാധാരണമായ ഇവിടെ, തൊഴിലാളികൾക്ക് മാസം 9,000 രൂപ മാത്രമാണ് തുച്ഛമായ വേതനമായി നൽകുന്നത്. വേതന വർദ്ധനവ് ആവശ്യപ്പെട്ട് തൊഴിലാളികൾ പ്രതിഷേധിച്ചപ്പോൾ, അവർക്ക് ലഭിച്ചത് പോലീസിൻ്റെ ലാത്തിയടിയും ഫാക്ടറി ഗേറ്റുകളിൽ നിന്ന് പുറത്താക്കപ്പെടുകയുമായിരുന്നു.
വി-ഗാർഡിലെ തൊഴിലാളികൾ ഒറ്റയ്ക്കല്ല. കഴിഞ്ഞ ഒരാഴ്ചയായി ഉത്തരാഖണ്ഡിലെ ഫാക്ടറികളിൽ നിന്ന് തൊഴിലാളികൾ ഒന്നിനുപുറകെ ഒന്നായി പ്രതിഷേധവുമായി ഉയർത്തെഴുന്നേൽക്കുകയാണ് – വെൽറൈസ് (Velrise), ടാറ്റ യസാകി (Tata Yazaki), സുപ്രജീത് (Suprajeet), എംഎംടി (MMT), സ്പാർക്ക് മിൻഡ (Spark Minda), ബജാജ് മോട്ടോഴ്സ് (Bajaj Motors) തുടങ്ങിയവ ഇതിൽ ചിലത് മാത്രമാണ്. ഇവയിൽ പല ഫാക്ടറികളിലെയും തൊഴിലാളികൾ തങ്ങളുടെ പോരാട്ടത്തിലൂടെ വേതന വർദ്ധനവ് നേടിയെടുക്കുകയും ചെയ്തു.
തൊഴിലാളികളിൽ നിന്ന് മിച്ചമൂല്യം പിഴിഞ്ഞെടുക്കാൻ മുതലാളിത്തത്തിന് പൂർണ്ണ സ്വാതന്ത്ര്യം നൽകുന്ന ഉത്തരാഖണ്ഡിലെ സംസ്ഥാന സർക്കാരിൻ്റെ നിലപാടിലാണ് ഇപ്പോഴത്തെ അവസ്ഥയുടെ അടിസ്ഥാനം.സംസ്ഥാനത്തെ ബിജെപിയുടെ ‘ഡബിൾ എൻജിൻ’ സർക്കാർ, സംസ്ഥാന രൂപീകരണത്തിന് ശേഷം 2000-ൽ നടത്തേണ്ടിയിരുന്ന മിനിമം വേതന പരിഷ്കരണം ഇതുവരെ നടത്തിയിട്ടില്ല. മിനിമം വേജസ് സ്റ്റേറ്റ് അഡ്വൈസറി ബോർഡ് പോലും ഇതുവരെ രൂപീകരിച്ചിട്ടില്ല. ഷോപ്പുകൾ, എസ്റ്റാബ്ലിഷ്മെൻ്റുകൾ എന്നിവയിലെ തൊഴിൽ മേഖലകളിൽ മിനിമം വേതനം അടുത്തിടെ ഏകപക്ഷീയമായി പരിഷ്കരിച്ചെങ്കിലും, എൻജിനീയറിംഗ് വ്യവസായത്തിലോ സംസ്ഥാനത്തെ മറ്റ് 57 തൊഴിൽ മേഖലകളിലോ ഇത് നടപ്പിലാക്കിയിട്ടില്ല.
സർക്കാരിൻ്റെ ഭാഗത്ത് നിന്നും പോലീസ് മർദ്ദനങ്ങളും അടിച്ചമർത്തലുകളും ഉണ്ടായിരുന്നിട്ടും, തൊഴിലാളികളുടെ പോരാട്ടവീര്യത്തെയും കൂട്ടായ ചെറുത്തുനിൽപ്പിനെയും തകർക്കാൻ കഴിഞ്ഞില്ല. ഇന്ത്യയിലെ സമകാലിക വ്യവസായ തൊഴിലാളിവർഗത്തിൻ്റെ മഹത്തായ ചരിത്രത്തിൽ മറ്റൊരു ഏടുകൂടി ഉത്തരാഖണ്ഡിലെ വ്യവസായ തൊഴിലാളികൾ എഴുതിച്ചേർക്കുകയാണ്.
നമ്മൾ ഇവിടെ പോരാടാനുണ്ട്, നമ്മൾ ഇവിടെ ഉറച്ചുനിൽക്കും, നമ്മൾ ഇവിടെ വിജയിക്കുക തന്നെ ചെയ്യും!
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
