ചലച്ചിത്ര മേഖല സ്ത്രീ സുരക്ഷിതവും സ്ത്രീ സൗഹൃദവുമാകണമെന്ന് മന്ത്രി വീണാ ജോര്ജ്. ക്യാമറയ്ക്ക് മുന്നിലും പുറകിലും കൂടുതല് സ്ത്രീകള് എത്തണം. പോഷ് നിയമത്തില് അവബോധം ശക്തമാക്കാന് സിനിമാ മേഖലയില് പരിശീലന പരിപാടി സംഘടിപ്പിക്കുമെന്നും മന്ത്രി പറഞ്ഞു. സിനിമാ മേഖലയില് പ്രവര്ത്തിക്കുന്നവരുടെ ഇടയില് പോഷ് നിയമത്തെപ്പറ്റി അവബോധം സൃഷ്ടിക്കുന്നതിനായി വനിതാ ശിശു വികസന വകുപ്പ് ജെന്ഡര് പാര്ക്കിന്റെ സഹായത്തോടുകൂടി സംഘടിപ്പിച്ച പരിശീലന പരിപാടി ഉത്ഘാടനം ചെയ്തു സംസാരിക്കുകയായിരുന്നു മന്ത്രി.
പോഷ് ആക്ട് 2013 ന്റേയും ജസ്റ്റിസ് ഹേമ കമ്മിറ്റി റിപ്പോര്ട്ടിന്റേയും അടിസ്ഥാനത്തിൽ സിനിമ മേഖലയില് പ്രവര്ത്തിക്കുന്ന എല്ലാവര്ക്കും സുരക്ഷിതമായ തൊഴില് അന്തരീക്ഷം ഉറപ്പ് വരുത്തേണ്ടതുണ്ട്. ഇത് കണക്കിലെടുത്തു കൊണ്ടാണ് സിനിമാ മേഖലയിലുള്ളവരെ ഉള്പ്പെടുത്തി പരിശീലന പരിപാടി സംഘടിപ്പിക്കുന്നത്.
ചലച്ചിത്ര മേഖലയില് ഏറ്റവും സുപ്രധാന ഇടപെടലിനാണ് സംസ്ഥാന സര്ക്കാര് തുടക്കം കുറിക്കുന്നതെന്നും മന്ത്രി പറഞ്ഞു. മലയാള സിനിമാ മേഖല സ്ത്രീ സൗഹൃദമാക്കുന്നതിന് ഏറ്റവും ഫലപ്രദമായിട്ടുള്ള പരിശീലന പരിപാടിയായിരിക്കും ഇതെന്നും മന്ത്രി വ്യക്തമാക്കി. പരിശീലന പരിപാടിയിൽ സിനിമാ രംഗത്തെ 60 ഓളം പേര് പങ്കെടുത്തു. ചീഫ് സെക്രട്ടറി ശാരദ മുരളീധരന്, വനിത ശിശുവികസന വകുപ്പ് പ്രിന്സിപ്പല് സെക്രട്ടറി ഡോ. ഷര്മിള മേരി ജോസഫ്, ഡയറക്ടര് ഹരിത വി തുടങ്ങിയവരും പങ്കെടുത്തു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
