എട്ട് വർഷമായി പതിവായി കഴിക്കുന്നു; ബിഗ് ബോസ് താരത്തിന്റെ മരണത്തിന് കാരണം ആന്റി-ഏജിംഗ് മരുന്നുകൾ ?

ബിഗ് ബോസ് താരവും നടിയും മോഡലുമായ ഷെഫാലി ജരിവാലയുടെ (41) മരണം എല്ലാവരെയും ഞെട്ടിച്ചിരിക്കുകയാണ്. നിയാഴ്ച വൈകുന്നേരം അടുത്ത കുടുംബാംഗങ്ങളുടെയും സുഹൃത്തുക്കളുടെയും സാന്നിധ്യത്തിൽ താരത്തിന്റെ അന്ത്യകർമ്മങ്ങൾ നടന്നു. ഷെഫാലി ജരിവാലയുടെ പെട്ടെന്നുള്ള മരണത്തെക്കുറിച്ചുള്ള അന്വേഷണത്തിൽ നിരവധി നിർണായക വിവരങ്ങൾ പുറത്തുവന്നിട്ടുണ്ട്.

സാക്ഷി മൊഴികൾ, തെളിവുകൾ, പ്രാഥമിക ഫോറൻസിക് വിവരങ്ങൾ എന്നിവയിൽ നിന്ന് പോലീസ് പ്രധാനപ്പെട്ട വിവരങ്ങൾ ശേഖരിച്ചിട്ടുണ്ടെന്ന് വൃത്തങ്ങൾ അറിയിച്ചു. മാധ്യമ റിപ്പോർട്ടുകൾ പ്രകാരം, കഴിഞ്ഞ ഏഴ്-എട്ട് വർഷമായി ഷെഫാലി പതിവായി വാർദ്ധക്യത്തിനെതിരായ മരുന്നുകൾ (ആന്റി ഏജിങ് മരുന്നുകൾ) കഴിക്കുന്നുണ്ടായിരുന്നു. ജൂൺ 27 ന് വീട്ടിൽ ഒരു പൂജ ഉണ്ടായിരുന്നു, അതിനാലാണ് ഷെഫാലി ഉപവസിച്ചത്. അന്നും അവർ ഈ മരുന്ന് ഉപയോ​ഗിച്ചിരുന്നു. വർഷങ്ങൾക്ക് മുമ്പ് ഒരു ഡോക്ടർ ഈ മരുന്നുകൾ അവർക്ക് നിർദ്ദേശിച്ചു, അതിനുശേഷം അവർ എല്ലാ മാസവും ഈ ചികിത്സ സ്വീകരിച്ചുവരികയാണ്. ഇതുവരെ പോലീസ് അന്വേഷണത്തിൽ, ഈ മരുന്നുകൾ ഹൃദയസ്തംഭനത്തിന് ഒരു പ്രധാന കാരണമായിരിക്കാമെന്ന് കണ്ടെത്തിയിട്ടുണ്ടെന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്.

ALSO READ: ‘ലൂസിഫറിന്റെ സംവിധായകന്‍ ഞാനായിരുന്നു എങ്കില്‍ വിവേക് ഒബ്റോയ്ക്ക് പകരം ആ മലയാള നടനെ നായകനാക്കുമായിരുന്നു, അദ്ദേഹം നന്നായി ഇംഗ്ലീഷ് പറയും’: ജഗദീഷ്

വെള്ളിയാഴ്ച രാത്രി 10 നും 11 നും ഇടയിൽ ഷെഫാലിയുടെ ആരോഗ്യനില വഷളാകാൻ തുടങ്ങിയതായി റിപ്പോർട്ടുകൾ പറയുന്നു. ശരീരം വിറയ്ക്കാൻ തുടങ്ങുകയും ബോധരഹിതയാവുകയും ചെയ്തു. ഉടൻ തന്നെ അവരെ ആശുപത്രിയിലേക്ക് കൊണ്ടുപോയി. ആ സമയത്ത്, ഷെഫാലിയും ഭർത്താവ് പരാഗും അമ്മയും മറ്റ് ചിലരും വീട്ടിൽ ഉണ്ടായിരുന്നു.

ആന്റി-ഏജിംഗ് വയൽസ്, വിറ്റാമിൻ സപ്ലിമെന്റുകൾ, ഗ്യാസ്ട്രിക് ഗുളികകൾ എന്നിവയുൾപ്പെടെ നിരവധി മരുന്നുകൾ ഫോറൻസിക് സംഘം വീട്ടിൽ നിന്ന് പിടിച്ചെടുത്തു. ഇതുവരെ പോലീസ് 8 പേരുടെ മൊഴികൾ രേഖപ്പെടുത്തിയിട്ടുണ്ട്, അതിൽ കുടുംബാംഗങ്ങൾ, വീട്ടുജോലിക്കാർ, ബെല്ലെവ്യൂ ആശുപത്രിയിലെ ഡോക്ടർമാർ എന്നിവരും ഉൾപ്പെടുന്നു. മരണത്തിന്റെ ഔദ്യോഗിക കാരണം ഇതുവരെ പുറത്തുവന്നിട്ടില്ല, പോസ്റ്റ്‌മോർട്ടം ഫലങ്ങളുടെയും പിടിച്ചെടുത്ത വസ്തുക്കളുടെ രാസ വിശകലനത്തിന്റെയും അടിസ്ഥാനത്തിലായിരിക്കും തുടർനടപടികൾ.

2002-ലെ കാന്ത ലഗ എന്ന സംഗീത വീഡിയോയിലൂടെയാണ് ഷെഫാലി ആദ്യമായി പ്രശസ്തിയിലേക്ക് ഉയർന്നത്. പിന്നീട് അക്ഷയ് കുമാറിനും സൽമാൻ ഖാനുമൊപ്പം മുജ്‌സെ ഷാദി കരോഗി എന്ന ചിത്രത്തിലും അഭിനയിച്ചു. പിന്നീടുള്ള വർഷങ്ങളിൽ അവർ ടെലിവിഷനിലേക്ക് മാറി, ഭർത്താവ് പരാഗ് ത്യാഗിയോടൊപ്പം നാച്ച് ബാലിയേ എന്ന ഡാൻസ് റിയാലിറ്റി ഷോയിൽ പങ്കെടുക്കുകയും പിന്നീട് ബിഗ് ബോസ് 13 ഹൗസിൽ എത്തുകയും ചെയ്തു.