2008 ലെ കേരള നെല്വയൽ–നീർത്തട സംരക്ഷണ ആക്റ്റ് സമഗ്രമായി പരിഷ്കരിക്കുമെന്ന യു.ഡി.എഫ് സർക്കാരിന്റെ നയപ്രഖ്യാപന പ്രസംഗത്തിലെ പ്രഖ്യാപനം കേരളത്തിന്റെ നിലനില്പ്പിന് തന്നെ ഭീഷണി ഉയര്ത്തുന്നതാണ് എന്ന് കേരള സ്റ്റേറ്റ് കര്ഷക തൊഴിലാളി യൂണിയൻ (കെ.എസ്.കെ.ടി.യു). നെല്വയൽ–നീർത്തട സംരക്ഷണ നിയമത്തെ കോർപ്പറേറ്റുകൾക്കും ഭൂമാഫിയക്കും അനുകൂലമായി അട്ടിമറിക്കാനുള്ള ശ്രമമാണിത് എന്നാരോപിച്ച് കെ.എസ്.കെ.ടി.യു സംസ്ഥാന പ്രസിഡന്റ് ആനാവൂർ നാഗപ്പൻയും ജനറൽ സെക്രട്ടറി എൻ. ചന്ദ്രൻയും പ്രസ്താവന പുറത്തിറക്കി.
ഭൂനിയമങ്ങളിൽ സമഗ്ര പരിഷ്കരണം കൊണ്ടുവരുന്നതിനും നിലവിലുള്ള നിയമങ്ങൾ പുനഃപരിശോധിക്കുന്നതിനുമായി കമ്മീഷൻ രൂപീകരിക്കുമെന്ന യു.ഡി.എഫ് നിലപാടിനെതിരെ യൂണിയൻ ശക്തമായ എതിർപ്പ് രേഖപ്പെടുത്തി. കമ്മീഷൻ ശുപാർശയുടെ അടിസ്ഥാനത്തിൽ ഭൂനിയമം പരിഷ്കരിക്കാൻ ശ്രമിച്ചാൽ കൈയും കെട്ടി നോക്കി നില്ക്കാന് സാധിക്കില്ല എന്ന് സംഘടന മുന്നറിയിപ്പ് നൽകി.
Also Read: ക്രിക്കറ്റ് കോച്ചിങ്ങിനായി എത്തിയ കുട്ടിയെ പീഡിപ്പിച്ച കോച്ചിന് 16 വർഷം കഠിനതടവ്
2008 വി എസ് അച്യുതാനന്ദന് സര്ക്കാര് നെല്വയല്-തണ്ണീര്ത്തട ആക്ട് കൊണ്ടു വരുന്നതിന് മുൻപ് വയൽ നികത്തലും പരിസ്ഥിതി തകർച്ചയും കടുത്ത കുടിവെള്ള ക്ഷാമവും സംസ്ഥാനത്തെ ഗുരുതരമായി ബാധിച്ചിരുന്നുവെന്നും സംഘടന ചൂണ്ടിക്കാട്ടി. നെല്വയലുകളും തണ്ണീർത്തടങ്ങളും വ്യാപകമായി നികത്തുന്നത് ഭക്ഷ്യസുരക്ഷ, ജൈവവൈവിധ്യം, ഭൂഗർഭജല നില എന്നിവയെ ഗുരുതരമായി ബാധിക്കുമെന്നും കെ.എസ്.കെ.ടി.യു മുന്നറിയിപ്പ് നൽകി. ഇത്തരം നീക്കങ്ങളുമായി യു ഡി എഫ് സര്ക്കാര് മുന്നോട്ടുപോയാല് കേരള സ്റ്റേറ്റ് കര്ഷക തൊഴിലാളി യൂണിയന് ഉശിരന് പ്രക്ഷോഭങ്ങളുമായി രംഗത്തിറങ്ങുമെന്ന് കെ എസ് കെ ടി യു ഭാരവാഹികള് പ്രസ്താവനയില് പറഞ്ഞു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
