അന്യഗ്രഹജീവികൾ സത്യമാണ്! പക്ഷേ ‘ഏരിയ 51’-ൽ അവരില്ല; ബരാക് ഒബാമയുടെ വെളിപ്പെടുത്തൽ ​ഇങ്ങനെ

അന്യഗ്രഹജീവികളുടെ നിലനിൽപ്പിനെക്കുറിച്ച് പലതരത്തിലുള്ള പ്രചാരങ്ങളും നിലവിലുണ്ട്. ഒരു വിഭാഗം ആളുകൾ അവ ഉണ്ടെന്ന് പറയുമ്പോൾ മറ്റുള്ളവർ എല്ലാം വെറും സങ്കൽപ്പങ്ങൾ ആണെന്ന് വിശ്വസിക്കാറുമുണ്ട്. ഇപ്പോഴിതാ മുൻ അമേരിക്കൻ പ്രസിഡന്റ് ബരാക് ഒബാമ പറഞ്ഞ കാര്യങ്ങൾ ആണ് ചർച്ചയാകുന്നത്. അന്യഗ്രഹജീവികൾ ഉണ്ടെന്ന് താൻ വിശ്വസിക്കുന്നുണ്ടെങ്കിലും അവർ എവിടെയാണെന്ന് തനിക്കറിയില്ലെന്ന് ഒരു അഭിമുഖത്തിൽ അദ്ദേഹം വ്യക്തമാക്കി. “അവർ യഥാർത്ഥമാണ്,” എന്ന് പറഞ്ഞ ഒബാമ, പക്ഷേ താൻ അവരെ നേരിട്ട് കണ്ടിട്ടില്ലെന്നും കൂട്ടിച്ചേർത്തു.

നെവാഡയിലെ അതീവ രഹസ്യ വ്യോമസേനാ താവളമായ ‘ഏരിയ 51’-ൽ (Area 51) അന്യഗ്രഹജീവികളെയോ അവരുടെ സാങ്കേതികവിദ്യയോ സർക്കാർ ഒളിപ്പിച്ചിട്ടുണ്ടെന്ന വർഷങ്ങളായുള്ള ഗൂഢാലോചന സിദ്ധാന്തങ്ങളെ അദ്ദേഹം തള്ളിക്കളഞ്ഞു. അമേരിക്കൻ പ്രസിഡന്റിൽ നിന്ന് പോലും മറച്ചുവെക്കാൻ മാത്രം വലിയൊരു ഗൂഢാലോചന അവിടെ നടക്കുന്നില്ലെങ്കിൽ, അവിടെ അത്തരം രഹസ്യ ഭൂഗർഭ സൗകര്യങ്ങൾ ഒന്നുമില്ലെന്ന് അദ്ദേഹം വ്യക്തമാക്കി.

ALSO READ: ആപ്പിളിന് മുന്നറിയിപ്പുമായി ഡോണാൾഡ് ട്രംമ്പ്

ആകാശത്ത് അജ്ഞാത വസ്തുക്കൾ (UAPs/UFOs) പ്രത്യക്ഷപ്പെടുന്നതിനെക്കുറിച്ചും അവയുടെ അസാധാരണമായ പറക്കൽ രീതികളെക്കുറിച്ചും ഒബാമ സംസാരിച്ചു. ഇത്തരം വസ്തുക്കളുടെ ദൃശ്യങ്ങളും രേഖകളും സർക്കാരിന്റെ പക്കലുണ്ടെന്നും എന്നാൽ അവയുടെ ഉത്ഭവം എവിടെയാണെന്ന് വിശദീകരിക്കാൻ ഇതുവരെ സാധിച്ചിട്ടില്ലെന്നും അദ്ദേഹം മുൻപ് വെളിപ്പെടുത്തിയിട്ടുണ്ട്. യുഎസ് എയർഫോഴ്സ് ഡ്രോണുകൾ പകർത്തിയ റഡാർ ദൃശ്യങ്ങൾ ഉൾപ്പെടെയുള്ള പുതിയ വിവരങ്ങൾ പുറത്തുവന്ന പശ്ചാത്തലത്തിലാണ് അന്യഗ്രഹജീവികളെ കുറിച്ചുള്ള ചർച്ചകൾ വീണ്ടും സജീവമാകുന്നത്.