നാളെ നമ്മുടേതാണ്, മാറ്റം ഇന്നേ തുടങ്ങട്ടെ

“നാളെ നമ്മുടേതാണ്, മാറ്റം ഇന്നേ തുടങ്ങട്ടെ!” — ഓഗസ്റ്റ് 12 അന്താരാഷ്ട്ര യുവജന ദിനമായി ആചരിക്കുമ്പോൾ ഈ വരികൾ മുന്നോട്ട് വെക്കുന്നത് വെറുമൊരു വാഗ്ദാനമല്ല. മറിച്ച് അടിയന്തരമായി ഏറ്റെടുക്കേണ്ട ഒരു ഉത്തരവാദിത്വത്തെയാണ് . 2026-ൽ ഈ ദിനം ലോകത്തിന് നൽകുന്ന സന്ദേശം വളരെ വ്യക്തമാണ്.

യുവാക്കൾ ഭാവിയിലെ നായകന്മാരാകാൻ കാത്തിരിക്കേണ്ടവരല്ല, ഇന്നത്തെ മാറ്റങ്ങൾക്ക് അമരക്കാരാകേണ്ടവരാണ്.ഇന്ത്യയുടെ ആകെ ജനസംഖ്യയുടെ 27 ശതമാനവും (15-29 വയസ്സ്) യുവജനങ്ങളാണ്. അതായത്, നമ്മുടെ സമൂഹത്തിലെ ഓരോ നാലാമത്തെ വ്യക്തിയും നവ ആശയങ്ങളും ഊർജ്ജവുമുള്ള ഒരു യുവാവാണ്.

ഇത്രയും ഭൂരിപക്ഷമുള്ള യുവസമ്പത്തിനെ കൃത്യമായ ദിശയിൽ തിരിച്ചുവിട്ടാൽ സാമ്പത്തിക മാന്ദ്യം, സാമൂഹിക അസമത്വങ്ങൾ, സാങ്കേതികപരമായ പിന്നാക്കാവസ്ഥ എന്നിവയെല്ലാം എളുപ്പത്തിൽ മറികടക്കാൻ ഇന്ത്യയ്ക്ക് സാധിക്കും. പരമ്പരാഗതമായ വഴികളിൽ നിന്ന് മാറി ചിന്തിക്കാനും, പുതിയ സാങ്കേതികവിദ്യകളെ വേഗത്തിൽ ഉൾക്കൊള്ളാനും യുവാക്കൾക്ക് കഴിയും.

വലിയ സാധ്യതകൾക്കിടയിലും ഇന്നത്തെ തലമുറ മുൻപെങ്ങും ഇല്ലാത്ത വിധം മൂന്ന് പ്രധാന വെല്ലുവിളികളെ നേരിടുന്നുണ്ട്.

ആർട്ടിഫിഷ്യൽ ഇന്റലിജൻസിന്റെ കടന്നുവരവോടെ പരമ്പരാഗത ജോലികൾ ഇല്ലാതാകുകയാണ്. വെറുമൊരു ബിരുദം കൊണ്ട് ഇനി വിജയിക്കാനാവില്ല. പുതിയ സാങ്കേതിക വിദ്യകൾ പഠിക്കുക, നൈപുണ്യങ്ങൾ നിരന്തരം പരിഷ്കരിക്കുക എന്നത് മാത്രമാണ് ഇതിനുള്ള പരിഹാരം.

അനന്തമായ വിവര ലഭ്യതയും ഡിജിറ്റൽ ലോകത്തെ ആഡംബര കാഴ്ചകളും യുവാക്കളിൽ ‘ഒറ്റപ്പെടലും’ അമിത സമ്മർദ്ദവും ഉണ്ടാക്കുന്നു. മറ്റുള്ളവരുടെ ജീവിതവുമായി സ്വന്തം ജീവിതത്തെ താരതമ്യം ചെയ്യുന്നത് മൂലമുണ്ടാകുന്ന മാനസിക പ്രയാസങ്ങൾ ഇന്ന് വ്യാപകമാണ്.

ആഗോളതാപനവും പരിസ്ഥിതി നാശവും കാരണം സ്വന്തം ഭാവി ജീവിതം തന്നെ സുരക്ഷിതമാണോ എന്ന ആശങ്ക ഇന്നത്തെ യുവാക്കൾക്കുണ്ട്. പ്രകൃതിയെ സംരക്ഷിക്കാനുള്ള പോരാട്ടത്തിൽ അവർക്ക് മുന്നിട്ടിറങ്ങേണ്ടി വരുന്നു.

കേരളത്തിലെ യുവത

ഈ വെല്ലുവിളികൾക്കിടയിലും കേരളത്തിലെ യുവജനങ്ങൾ തങ്ങളുടെ കഴിവ് തെളിയിച്ചവരാണ്. 2018, 2019 കാലഘട്ടങ്ങളിലെ മഹാപ്രളയങ്ങളിൽ സ്വന്തം ജീവൻ പോലും പണയം വെച്ച് എൽ ഡി എഫ് സർക്കാരിനൊപ്പം രക്ഷാപ്രവർത്തനം നടത്തിയത് ഇവിടത്തെ യുവതയാണ്.

കോവിഡ് മഹാമാരിയുടെ സമയത്ത് ഭക്ഷണവും മരുന്നും വീടുകളിലെത്തിക്കാനും, പ്രതിരോധ പ്രവർത്തനങ്ങൾ ഏകോപിപ്പിക്കാനും ‘സന്നദ്ധസേന’ വഴി യുവാക്കൾ മുന്നിട്ടിറങ്ങി.

ജോലി അന്വേഷിച്ചു നടക്കുന്നതിന് പകരം കേരള സ്റ്റാർട്ടപ്പ് മിഷൻ (KSUM) പോലെയുള്ള സംവിധാനങ്ങൾ പ്രയോജനപ്പെടുത്തി സ്വന്തമായി സംരംഭങ്ങൾ തുടങ്ങുകയും മറ്റുള്ളവർക്ക് തൊഴിൽ നൽകുകയും ചെയ്യുന്ന രീതിയിലേക്ക് മലയാളിയായ യുവത്വം മാറി.

സർക്കാരിന്റെയും സമൂഹത്തിന്റെയും ചുമതലയുവാക്കളുടെ കഴിവ് പൂർണ്ണമായി പ്രയോജനപ്പെടുത്താൻ അവർക്ക് അനുകൂലമായ അന്തരീക്ഷം ഒരുക്കേണ്ടതുണ്ട്.

യുവാക്കളെ വിമർശിക്കാനല്ല, വിശ്വസിക്കാനുള്ള സമയമാണിത്. ഈ അന്താരാഷ്ട്ര യുവജന ദിനത്തിൽ നമുക്ക് ഉറപ്പിക്കാം. അവർക്ക് ആവശ്യമായ പിന്തുണയും സ്വാതന്ത്ര്യവും നൽകിയാൽ ഈ നാടിന്റെയും ലോകത്തിന്റെയും ഭാവി സുരക്ഷിത കരങ്ങളിലായിരിക്കും.