ദില്ലിയിലെ നിരാഹാര സമരത്തിന് പിന്തുണ: സർവ്വകലാശാല ആസ്ഥാനങ്ങളിൽ ഇന്ന് എസ്എഫ്ഐയുടെ രാപ്പകൽ സമരം

രാജ്യത്തെയും സംസ്ഥാനത്തെയും വിദ്യാഭ്യാസ മേഖലയിൽ നിലനിൽക്കുന്ന ഗുരുതരമായ ക്രമക്കേടുകൾക്കും ഭരണപരമായ വീഴ്ചകൾക്കുമെതിരെ ശക്തമായ പ്രതിഷേധവുമായി എസ്എഫ്ഐ രംഗത്തെന്ന് പി എസ് സഞ്ജീവ് അറിയിച്ചു. നീറ്റ് പരീക്ഷാ ക്രമക്കേടുകൾ മുതൽ സംസ്ഥാനത്തെ എൽഎൽബി എൻട്രൻസ് അപാകതകൾ വരെ ചൂണ്ടിക്കാട്ടിയാണ് സംഘടന പ്രക്ഷോഭം കടുപ്പിക്കുന്നത്.

നീറ്റ് പരീക്ഷയിലെ ക്രമക്കേടുകൾക്കെതിരെ രാജ്യതലസ്ഥാനത്ത് ശക്തമായ സമരം നടക്കുകയാണെന്ന് അദ്ദേഹം പറഞ്ഞു. പരീക്ഷാ ഏജൻസിയായ എൻടിഎ പിരിച്ചുവിടണമെന്നും കേന്ദ്ര വിദ്യാഭ്യാസ മന്ത്രി രാജിവെക്കണമെന്നുമാണ് പ്രധാന ആവശ്യം. രാജ്യത്തെ വിദ്യാഭ്യാസ സമ്പ്രദായം കുത്തഴിഞ്ഞിരിക്കുകയാണെന്ന് ജനങ്ങൾ തിരിച്ചറിഞ്ഞു കഴിഞ്ഞു. യുജിസി നെറ്റ് (UGC NET) പരീക്ഷയിലും സമാനമായ തിരിമറികൾ നടന്നു. സമരങ്ങളെ ഇല്ലാതാക്കാനുള്ള കേന്ദ്ര നീക്കങ്ങൾക്കെതിരെയും സോനം വാങ്ചുക്കിനെ അറസ്റ്റ് ചെയ്തതിനെതിരെയും എസ്എഫ്ഐ വലിയ പ്രതിഷേധമാണ് സംഘടിപ്പിക്കുന്നത്.

സമരത്തിന് ഐക്യദാർഢ്യം പ്രഖ്യാപിച്ച് എസ്എഫ്ഐ അഖിലേന്ത്യാ നേതൃത്വം നിരാഹാര സമരം ആരംഭിച്ചു കഴിഞ്ഞു. ഇതിന്റെ ഭാഗമായി കേരളത്തിലെ എല്ലാ സർവ്വകലാശാല ആസ്ഥാനങ്ങളിലും ഇന്ന് വൈകിട്ട് മുതൽ നാളെ വൈകിട്ട് വരെ രാപകൽ സമരം നടത്തും. ജൂലൈ 21-ന് എല്ലാ സ്കൂളുകളിലും കോളേജുകളിലും ഉച്ചഭക്ഷണം ബഹിഷ്കരിച്ചുകൊണ്ട് വിദ്യാർത്ഥികൾ പ്രതിഷേധിക്കും. 23-ന് സംസ്ഥാന വ്യാപകമായി അവകാശ പത്രിക മാർച്ചുകൾ സംഘടിപ്പിക്കുമെന്നും സഞ്ജീവ് അറിയിച്ചു.

ALSO READ: ‘കെ. കരുണാകരന്റെ ചിത്രം വെച്ചിട്ടുള്ള വീടുകളിൽ നിന്നും ബി.ജെ.പിക്കാരുടെ വീടുകളിൽ നിന്നും പൊതിച്ചോറ് നൽകുന്നുണ്ട്’; പാവപ്പെട്ടവന്റെ ചോറിൽ മണ്ണുവാരി ഇടരുതെന്ന് എ. എ. റഹീം എം.പി

സംസ്ഥാനത്തെ എൽഎൽബി എൻട്രൻസ് പരീക്ഷാ ഫലത്തിൽ ഗുരുതരമായ അപാകതകളാണ് സംഭവിച്ചത്. മൈനസ് മാർക്ക് നൽകാതെ ലിസ്റ്റ് പ്രസിദ്ധീകരിച്ചത് മൂലം റാങ്ക് ലിസ്റ്റുകൾ മാറിമറിഞ്ഞു. സോഫ്റ്റ്‌വെയർ പ്രശ്നങ്ങൾക്ക് പുറമെ, ദേശീയത തെളിയിക്കാൻ സർട്ടിഫിക്കറ്റ് ആവശ്യപ്പെട്ടത് വിദ്യാർത്ഥികളുടെ ജാതിയും മതവും മനസ്സിലാക്കാനാണെന്നും അദ്ദേഹം ആരോപിച്ചു.

കൂടാതെ, തിരുവനന്തപുരം എൻജിനീയറിങ് കോളേജിനെ സാങ്കേതിക സർവ്വകലാശാലയുടെ കീഴിലാക്കാനുള്ള നീക്കം ഗവർണർക്കും സംഘപരിവാറിനും കോളേജിൽ നേരിട്ട് ഇടപെടാൻ അവസരമൊരുക്കാനാണെന്ന് അദ്ദേഹം കുറ്റപ്പെടുത്തി. ഇത് ഫീസ് വർദ്ധനവിനും വിദ്യാർത്ഥികളുടെ ആനുകൂല്യങ്ങൾ നഷ്ടപ്പെടാനും കാരണമാകും. ഈ നീക്കത്തിനെതിരെ ശക്തമായ സമരം നടത്തുമെന്നും അദ്ദേഹം മുന്നറിയിപ്പ് നൽകി.

സ്കൂളുകളിൽ കഴിഞ്ഞ സർക്കാർ നടപ്പിലാക്കിയ കേഫോൺ ഇന്റർനെറ്റ് സൗകര്യം നിർത്തലാക്കുന്നത് സാധാരണക്കാരായ വിദ്യാർത്ഥികളെ ബാധിക്കുമെന്ന് സഞ്ജീവ് പറഞ്ഞു. ഡിജിറ്റൽ ക്ലാസ്സ്‌ റൂമുകളുടെ ഭാഗമായ ഈ പദ്ധതി നിർത്തലാക്കരുത്. കുട്ടികൾക്ക് പരിമിതികൾ ഉണ്ടാക്കാതെ അവർക്ക് പഠിക്കാനുള്ള സാഹചര്യം ഒരുക്കണമെന്നും അദ്ദേഹം സർക്കാരിനോട് ആവശ്യപ്പെട്ടു. ഓണപ്പരീക്ഷാ കാലത്തെ പവർകട്ട് വിദ്യാർത്ഥികളെ പ്രതിസന്ധിയിലാക്കുമെന്നും വിദ്യാഭ്യാസ രംഗത്തെ പഴയകാലത്തേക്ക് തിരികെ കൊണ്ടുപോകരുതെന്നും അദ്ദേഹം കൂട്ടിച്ചേർത്തു