പ്രമേഹത്തെ വരുതിയിലാക്കാം ഈ കാര്യങ്ങൾ ശ്രദ്ധിച്ചാൽ

 ഭക്ഷണകാര്യങ്ങളിൽ ചില കാര്യങ്ങൾ ശ്രദ്ധിച്ചാൽ പട്ടിണി കിടക്കാതെ തന്നെ പ്രമേഹത്തെ വരുതിയിലാക്കാം.

പ്രാതലിനു പുട്ട്, ഉപ്പുമാവ്, ഇഡ്ഡലി, ദോശ മുതലായവ കഴിക്കാം. പക്ഷേ ശ്രദ്ധിക്കേണ്ടത് പുട്ടിനൊപ്പം പഴമോ പഞ്ചസാരയോ ഉപയോഗിക്കാൻ പാടില്ല എന്നുള്ളതാണ്. പകരം പുട്ടിനൊപ്പം കടലക്കറിയോ ചെറുപയർ കറിയോ കഴിക്കാം അതും പുട്ടിന്റെ അതേ അളവിൽ തന്നെ കറികളും കഴിക്കണം. ഉപ്പുമാവാണെങ്കിൽ‌ പച്ചക്കറികൾ ധാരാളം ചേർത്ത് തയാറാക്കി കഴിക്കണം. ഒരു കപ്പ് ഉപ്പുമാവിൽ കൂടുതൽ കഴിക്കരുത്. പൂരി കഴിക്കാം പക്ഷേ പൂരി ബാജി കഴിക്കരുത്. പകരം പൂരിക്കൊപ്പം മിക്സ്ഡ് വെജിറ്റബിൾ കറി കഴിക്കാം. ഇഡ്ഡലിയോ ദോശയോ ആണെങ്കിൽ മൂന്നോ നാലോ എണ്ണം കഴിക്കാം. ഒപ്പം ചട്ണിയോ സാമ്പാറോ ആകാം. ഇടസമയത്ത് ഒരു സ്നാക്ക് കഴിക്കാം. അതു സാലഡോ ഫൈബർ അടങ്ങിയ ബിസ്കറ്റോ ആകാം. ഒരു മുട്ട പുഴുങ്ങി കഴിക്കുന്നതും നല്ലതാണ്.

ഉച്ച ഭക്ഷണത്തിൽ തവിടുള്ള അരി ഉപയോഗിക്കണം. പച്ചക്കറികൾ ധാരാളം കഴിക്കുക. മീൻ, ഇറച്ചി എന്നിവ കറി വച്ചു കഴിക്കാം. വറുത്തു കഴിക്കുന്നത് ആരോഗ്യപ്രദമല്ല. ഭക്ഷണത്തോടൊപ്പമോ ഭക്ഷണത്തിനു മുൻപോ സാലഡ് കഴിക്കുന്നത് നല്ലതാണ്.

നാലുമണിക്ക് ചായയ്ക്കൊപ്പം സ്നാക്ക് കഴിക്കാം, പക്ഷേ എണ്ണയിൽ വറുത്തവ കഴിക്കരുത്. ഫൈബർ അടങ്ങിയ ബിസ്ക്കറ്റുകളോ റസ്ക്കോ കഴിക്കാം. ഒരു ദിവസം രണ്ടോ മൂന്നോ ചായ(കാപ്പി) കുടിക്കാം, പാലൊഴിച്ച് പക്ഷേ പഞ്ചസാര പാടില്ല.

അത്താഴത്തിനു ചപ്പാത്തിയോ ഓട്സോ കഴിക്കാം. ചപ്പാത്തി കഴിക്കുമ്പോൾ ഹോൾ വീറ്റ് ആട്ട കൊണ്ടുണ്ടാക്കിയ ചപ്പാത്തി കഴിക്കാൻ ശ്രദ്ധിക്കുക. ഗോതമ്പു ദോശയും മറ്റും കഴിക്കാവുന്നതാണ്.

പഴങ്ങൾ പൂർണ്ണമായും ഒഴിവാക്കേണ്ട ആവശ്യമില്ല. ദിവസവും ഒരു പഴം കഴിക്കാവുന്നതാണ്. ചെറുപഴമാണെങ്കിൽ ദിവസവും രണ്ടെണ്ണം കഴിക്കാം. മാങ്ങയുടെ സീസൺ ആണെങ്കിൽ ഒരു വലിയ കഷ്ണം കഴിക്കാവുന്നതാണ്. സിട്രസ് ഫ്രൂട്ട് ഒരെണ്ണം കഴിക്കാം. ഇവ ഫ്രൂട്ട് ആയി തന്നെ കഴിക്കാൻ ശ്രദ്ധിക്കണം. സീസണൽ ഫ്രൂട്ടുകൾ കഴിക്കുന്നതാണ് എപ്പോഴും നല്ലത്. ഒഴിവാക്കേണ്ടത് പഞ്ചസാര, തേൻ, ശര്‍ക്കര പോലുള്ള മധുരങ്ങളാണ്.

ഇങ്ങനെ കഴിക്കുന്നതു കൊണ്ടു മാത്രമായില്ല, കൃത്യസമയത്തു ഭക്ഷണം കഴിക്കാനും ശ്രദ്ധിക്കണം. പ്രാതൽ ഒൻപതു മണിക്കുമുൻപു കഴിക്കണം. ഉച്ചയ്ക്ക് ഒരു മണിക്കും അത്താഴം കിടക്കുന്നതിനു മൂന്നു മണിക്കൂർ മുൻപും കഴിക്കണം.

ഇവയൊക്കെ ശ്രദ്ധിച്ചാൽ പ്രമേഹത്തെ നിയന്ത്രിക്കാൻ സാധിക്കും. പക്ഷേ മരുന്നു കഴിക്കാൻ മടി കാണിക്കരുത്. ഡോക്ടറുടെ നിർദ്ദേശപ്രകാരമല്ലാതെ മരുന്നിന്റെ അളവു കൂട്ടുകയോ കുറയ്ക്കുകയോ ചെയ്യുവാൻ പാടില്ല.

കൈരളി ഓണ്‍ലൈന്‍ വാര്‍ത്തകള്‍ വാട്‌സ്ആപ്ഗ്രൂപ്പിലും  ലഭ്യമാണ്.  വാട്‌സ്ആപ് ഗ്രൂപ്പില്‍ അംഗമാകാന്‍ ഈ ലിങ്കില്‍ ക്ലിക്ക് ചെയ്യുക.

whatsapp

കൈരളി ന്യൂസ് വാട്‌സ്ആപ്പ് ചാനല്‍ ഫോളോ ചെയ്യാന്‍ ഇവിടെ ക്ലിക്ക് ചെയ്യുക

Click Here
ksfe-diamond
bhima-jewel