കളിച്ച് ജയിച്ച ട്രോഫി എപ്പോ കിട്ടും? ഇന്ത്യൻ ടീമിന് ലഭിക്കേണ്ട ഏഷ്യാകപ്പ് കിരീടം പാകിസ്ഥാൻകാരനായ എസിസി മേധാവി ഹോട്ടൽ മുറിയിൽ ഒളിപ്പിച്ചു!

2025 ലെ ഏഷ്യാ കപ്പ് ഫൈനൽ നാടകീയമായാണ് പര്യവസാനിച്ചത്. ഞായറാഴ്ച ദുബായിൽ വാശിയേറിയ പോരാട്ടത്തിൽ ഇന്ത്യ 5 വിക്കറ്റിന് പാകിസ്ഥാനെ തോൽപിച്ച് കിരീടം നേടി. എന്നാൽ, ഏഷ്യാ കപ്പ് ട്രോഫിയില്ലാതെയാണ് ഇന്ത്യൻ ടീമിന് സമാപന ചടങ്ങ് പൂർത്തിയാക്കേണ്ടിവന്നത്, കാരണം ഏഷ്യൻ ക്രിക്കറ്റ് കൗൺസിൽ (എസിസി) മേധാവി മൊഹ്‌സിൻ നഖ്‌വി ട്രോഫിയും വിജയികളുടെ മെഡലുകളുമായി സ്റ്റേഡിയം വിടുകയായിരുന്നു. നഖ്‌വിയുടെ കൈകളിൽ നിന്ന് ഇന്ത്യൻ ടീം ട്രോഫി സ്വീകരിക്കില്ലെന്ന് പ്രതീക്ഷിച്ചിരുന്നെങ്കിലും, വിജയിക്കുന്ന ടീമിന് ട്രോഫി നൽകേണ്ടതില്ലെന്ന എസിസി മേധാവിയുടെ തീരുമാനം എല്ലാവരെയും അക്ഷരാർത്ഥത്തിൽ ഞെട്ടിച്ചു.

ഇന്ത്യൻ ക്രിക്കറ്റ് കൺട്രോൾ ബോർഡ് (ബിസിസിഐ) സെക്രട്ടറി ദേവജിത് സൈകിയ, നഖ്‌വിയുടെ പ്രവൃത്തിയിൽ അത്ഭുതം പ്രകടിപ്പിക്കുകയും ട്രോഫിയും മെഡലുകളുമായി സ്റ്റേഡിയം വിട്ടതിന് അദ്ദേഹത്തെ വിമർശിക്കുകയും ചെയ്തു. പാകിസ്ഥാൻ ക്രിക്കറ്റ് ബോർഡിന്റെ തലവനായ നഖ്‌വിയിൽ നിന്ന് ഇന്ത്യ ട്രോഫി സ്വീകരിക്കാൻ വിസമ്മതിച്ചത് എന്തുകൊണ്ടാണെന്നും സൈകിയ വിശദീകരിച്ചു.

Also Read : ഏഷ്യാ കപ്പ് കിരീടം ഏറ്റുവാങ്ങാതെ ഇന്ത്യൻ ടീം; കൈമാറേണ്ടിയിരുന്നത് പാക് മന്ത്രി കൂടിയായ മൊഹ്സിന്‍ നഖ്‌വി

“ഇന്ത്യ ഒരു രാജ്യവുമായി യുദ്ധം ചെയ്യുകയാണ്, ആ രാജ്യത്തെ ഒരു നേതാവ് ഞങ്ങൾക്ക് ട്രോഫി കൈമാറേണ്ടതായിരുന്നു… നമ്മുടെ രാജ്യത്തിനെതിരെ യുദ്ധം ചെയ്യുന്ന ഒരു രാജ്യത്തെ പ്രതിനിധീകരിക്കുന്ന ഒരാളിൽ നിന്ന് നമുക്ക് ട്രോഫി സ്വീകരിക്കാൻ കഴിയില്ല. അതിനാൽ ഞങ്ങൾ ആ ട്രോഫി സ്വീകരിക്കാൻ വിസമ്മതിച്ചു, പക്ഷേ അതിന് ആ മാന്യൻ ട്രോഫിയും നമ്മുടെ രാജ്യത്തിന് നൽകേണ്ട മെഡലുകളും സ്വന്തം ഹോട്ടൽ മുറിയിലേക്ക് കൊണ്ടുപോകുമെന്ന് കരുതിയില്ല. അത് തികച്ചും അപ്രതീക്ഷിതമാണ്, അദ്ദേഹത്തിന്റെ വെളിവുണ്ടാകുമെന്ന് ഞങ്ങൾ പ്രതീക്ഷിക്കുന്നു, അദ്ദേഹം എത്രയും വേഗം ഇന്ത്യയ്ക്ക് ട്രോഫി തിരികെ എത്തിക്കും, അങ്ങനെയെങ്കിലും ധാർമികത കാണിക്കണം,” മത്സരത്തിനുശേഷം ANI-യുമായുള്ള ഒരു ചാറ്റിൽ സൈകിയ പറഞ്ഞു. ഏഷ്യാ കപ്പിൽ ഉടനീളം ഇന്ത്യൻ ടീം പാക് കളിക്കാരോട് സൌഹാർദത്തോടെ ഇടപെടുന്നതിൽ വിസമ്മതിച്ചു.

ഏഷ്യൻ ക്രിക്കറ്റ് കൗൺസിൽ മേധാവിയുടെ ഈ പ്രവൃത്തിക്കെതിരെ ബിസിസിഐ ശക്തമായ പ്രതിഷേധം രേഖപ്പെടുത്തുമെന്നും സൈകിയ പറഞ്ഞു. “സമ്മാന വിതരണ ചടങ്ങിൽ നഖ്വിയുടെ പെരുമാറ്റത്തിൽ ഞങ്ങൾ വളരെ ശക്തമായ പ്രതിഷേധം രേഖപ്പെടുത്തും,” അദ്ദേഹം പറഞ്ഞു.