പൃഥ്വിരാജ്(Prithviraj)ബ്ലെസി ടീമിന്റെ സ്വപ്നപദ്ധതിയായ ‘ആടുജീവിത’ത്തിന്റെ(Aadujeevitham) ഷൂട്ടിങ് അവസാനഘട്ടത്തിലേക്ക് കടന്നു. നീണ്ട നാലരവര്ഷത്തെ ചിത്രീകരണം നാളെ പൂര്ത്തിയാകും. ഫൈനല് ഷെഡ്യൂള് റാന്നിയില് ആരംഭിച്ചു കഴിഞ്ഞു. പൃഥ്വിരാജിനെ കൂടാതെ അമലാപോളും ശോഭാ മോഹനുമാണ് മലയാളത്തില് നിന്നുള്ള മറ്റു താരങ്ങള്. എ.ആര്. റഹ്മാനാണ്(A R Rahman) ചിത്രത്തിന് സംഗീതം നിര്വഹിക്കുന്നത്. കെ.എസ്. സുനിലാണ് ഛായാഗ്രാഹകന്. പ്രശാന്ത് മാധവ് കലാസംവിധാനം നിര്വഹിക്കുന്ന ചിത്രത്തിന്റെ മേക്കപ്പ്മാന് രഞ്ജിത്ത് അമ്പാടിയാണ്. ചിത്രീകരണത്തിനായി 160 ലേറെ ദിവസങ്ങളാണ് വേണ്ടിവന്നതെങ്കിലും അത് പൂര്ത്തിയാക്കാന് നാലര വര്ഷത്തോളം കാത്തിരിക്കേണ്ടിവന്നു.
2018ലാണ് ബ്ലെസിയുടെ സംവിധാനത്തില് ആടുജീവിതത്തിന്റെ ഷൂട്ടിങ് ആരംഭിച്ചത്. പത്തനംതിട്ടയിലായിരുന്നു തുടക്കവും. അതേ വര്ഷം ജോര്ദ്ദാനിലും ചിത്രീകരണം നടന്നു. അവിടെ 30 ദിവസത്തോളം വര്ക്കുണ്ടായിരുന്നു. പിന്നീട് 2020 ലാണ് ജോര്ദ്ദാനിലെത്തുന്നത്. അത്തവണ അള്ജീരിയ ഷെഡ്യൂള് കൂടി പ്ലാന് ചെയ്തിരുന്നു. എന്നാല് കൊവിഡ് വ്യാപനത്തെത്തുടര്ന്ന് 65 ദിവസത്തോളം ബ്ലെസിയും സംഘവും ജോര്ദാനില് കുടുങ്ങി കിടക്കേണ്ടിവന്നു.
രണ്ടര മാസത്തിനു ശേഷം 2020 മേയ് 22നാണ് സംഘം പ്രത്യേക വിമാനത്തില് കൊച്ചിയിലെത്തിയത്. അതിനിടെ സിനിമയുടെ പ്രധാന ഭാഗങ്ങള് ജോര്ദാനില് ചിത്രീകരിച്ചിരുന്നു. ജോര്ദാനിലെ ഷെഡ്യൂള് പൂര്ത്തിയാക്കിയതിനു ശേഷമായിരുന്നു സംഘത്തിന്റെ മടക്കം. പിന്നീട് ഒരു വര്ഷം കൊവിഡ് കാരണം ഷൂട്ടിങ് നടന്നില്ല. അതിനിടെ പോസ്റ്റ് പ്രൊഡക്ഷന് വര്ക്കുകള് പുരോഗമിക്കുന്നുണ്ടായിരുന്നു.
2022 മാര്ച്ച് പതിനാറിന് സഹാറ, അള്ജീരിയ എന്നിവിടങ്ങളില് ചിത്രീകരണത്തിന്റെ രണ്ടാം ഘട്ടം തുടങ്ങി. മാര്ച്ച് 31ന് പൃഥ്വിരാജ് ലൊക്കേഷനില് എത്തി. കോവിഡ് പശ്ചാത്തലത്തില് ജോര്ദാനില് കര്ഫ്യൂ പ്രഖ്യാപിച്ചത് ചിത്രീകരണം തടസ്സപ്പെടുത്തിയിരുന്നു. ഏപ്രില് ഒന്നിന് നിര്ത്തിവെച്ച ചിത്രീകരണം പിന്നീട് ഏപ്രില് 24ന് ജോര്ദാനിലെ വാദിറാമില് ആണ് ആരംഭിച്ചത്. നാല്പതു ദിവസം സഹാറ മരുഭൂമിയിലും 35 ദിവസത്തോളം ജോര്ദാനിലെ വാദിറാമിലും ആണ് ചിത്രീകരണം നടന്നത്. ജൂണ് പതിനാറിനാണ് പൃഥ്വി തിരികെ നാട്ടിലെത്തിയത്.
സിനിമാപ്രേമികളെല്ലാം കാത്തിരിക്കുന്ന ചിത്രമാണ് ബെന്യാമിന്റെ പ്രശസ്ത നോവലിനെ ആധാരമാക്കിയുള്ള ആടുജീവിതം. സൗദി അറേബ്യയിലെ ഇന്ത്യന് കുടിയേറ്റ തൊഴിലാളിയായ നജീബ് എന്ന കഥാപാത്രത്തെയാണ് ചിത്രത്തില് പൃഥ്വി അവതരിപ്പിക്കുന്നത്. സിനിമയ്ക്കായി ശരീരഭാരം കുറച്ചതിന്റെ കഷ്ടപ്പാടുകള് അടുത്തകാലത്ത് പൃഥ്വി തുറന്നു പറയുകയും ചെയ്തിരുന്നു.
കൈരളി ഓണ്ലൈന് വാര്ത്തകള് വാട്സ്ആപ്ഗ്രൂപ്പിലും ലഭ്യമാണ്. വാട്സ്ആപ് ഗ്രൂപ്പില് അംഗമാകാന് ഈ ലിങ്കില് ക്ലിക്ക് ചെയ്യുക.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here