ഒരു ദശാബ്ദത്തിന് ശേഷം ‘ബ്ലൂ ടൈഗേഴ്സ്’ കൊച്ചിയിലേക്ക് മടങ്ങിയെത്തുന്നു. മാർച്ച് 31-ന് ഹോങ്കോങ്ങിനെ നേരിടുമ്പോൾ ആരാധകർ ആവേശത്തിലാണെങ്കിലും ഇന്ത്യൻ ഫുട്ബോൾ വലിയ പ്രതിസന്ധിയിലാണ്. ഇന്ത്യ 2026 ലോകകപ്പ് യോഗ്യതാ റൗണ്ടിൽ നിന്നും 2027 ഏഷ്യൻ കപ്പ് യോഗ്യതാ റൗണ്ടിൽ നിന്നും ഇതിനോടകം പുറത്തായിക്കഴിഞ്ഞു. ഈ ദയനീയ പരാജയത്തോടെ, ഇന്ത്യൻ ഫുട്ബോളിന്റെ ഉയർത്തെഴുന്നേൽപ്പിനായി പ്രഖ്യാപിക്കപ്പെട്ട ‘വിഷൻ 2047’ വെറുമൊരു പാഴ്വാക്കായി മാറുമോ എന്ന ഭീതിയിലാണ് ആരാധകരും കായിക ലോകവും. ഈ തകർച്ച തടയാൻ വിദേശ ലീഗുകളിൽ തിളങ്ങിയ ഇന്ത്യൻ താരങ്ങളെയാണ് പരിശീലകൻ ഖാലിദ് ജമീൽ ഇപ്പോൾ പരീക്ഷിക്കുന്നത്.
ഇംഗ്ലീഷ് ലീഗുകളിലെ അനുഭവസമ്പത്തുമായി ഐഎസ്എല്ലിൽ കളിക്കുന്ന റയാൻ വില്യംസും, ബൊളീവിയൻ ടോപ്പ് ടയർ ലീഗിൽ കളിക്കുന്ന ആദ്യ ഇന്ത്യൻ വംശജനായ അബ്നീത് ഭാരതിയുമാണ് ഈ പുതിയ പ്രതീക്ഷകൾ. നേപ്പാളിൽ ജനിച്ച ഭാരതിയും വില്യംസും കൊച്ചിയിലെ ക്യാമ്പിൽ ചേർന്നു കഴിഞ്ഞു.
റയാൻ വില്യംസ് അരങ്ങേറ്റത്തിന് തയ്യാറെടുക്കുമ്പോൾ, ഫിഫയുടെ അന്തിമ അനുമതിക്കായി കാത്തിരിക്കുകയാണ് ഭാരതി. ചൊവ്വാഴ്ചത്തെ മത്സരത്തിൽ ഈ ‘ഗ്ലോബൽ ഇന്ത്യൻ’ താരങ്ങൾക്ക് തിളങ്ങാൻ സാധിച്ചാൽ അത് പുതിയൊരു ദിശാബോധം നൽകും. മറിച്ച് പരാജയപ്പെട്ടാൽ, കൊച്ചിയിലെ ഈ മടങ്ങിവരവ് ഇന്ത്യൻ ഫുട്ബോളിന്റെ സമ്പൂർണ്ണ തകർച്ചയുടെ തുടക്കമായി മാറിയേക്കാം.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
