നെടുങ്കണ്ടത്ത് തൊഴിലാളികൾ സഞ്ചരിച്ച വാഹനം അപകടത്തിൽപ്പെട്ട് അഞ്ചുപേർക്ക് പരുക്ക്

ഇടുക്കി നെടുങ്കണ്ടത്ത് തൊഴിലാളികൾ സഞ്ചരിച്ച വാഹനം അപകടത്തിൽപ്പെട്ട അഞ്ചുപേർക്ക് പരുക്ക്. കമ്പംമെട്ട് – വണ്ണപ്പുറം സംസ്ഥാനപാതയിൽ ഇടത്തറമുക്കിന് സമീപമാണ് അപകടമുണ്ടായത്. രാവിലെ എട്ടുമണിയോട് കൂടിയാണ് സംഭവം. അമിത വേഗതയിൽ എത്തിയ വാഹനം വളവിൽ നിയന്ത്രണം നഷ്ടപ്പെട്ട് സമീപത്തുള്ള ഏലത്തോട്ടത്തിലേക്ക് പതിക്കുകയായിരുന്നു. കുത്തിറക്കത്തിൽ 50 മീറ്ററോളം പാഞ്ഞ വാഹനം മരത്തിൽ ഇടിച്ചാണ് നിന്നത്.

വാഹനത്തിൽ ഉണ്ടായിരുന്ന സ്ത്രീ തൊഴിലാളികൾക്കാണ് പരുക്കേറ്റത്. ഇവരെ തൂക്കുപാലത്തും നെടുങ്കണ്ടത്തുമുള്ള സ്വകാര്യ ആശുപത്രികളിൽ പ്രവേശിപ്പിച്ചു. തെക്കേമുറി അനീഷിന്റെ ഏലത്തോട്ടത്തിലേക്കാണ് വാഹനം പതിച്ചത്. മേഖലയിൽ ക്രാഷ് ബാരിയറുകളുടെ അഭാവം ഉണ്ടെന്നാണ് നാട്ടുകാർ പറയുന്നത്.

ALSO READ; ‘ഈ എപ്പിസോഡിൽ നിന്നും പാർട്ടിക്കും പ്രവർത്തകർക്കും ധാരാളം പഠിക്കാനുണ്ട്’; രാഹുലിനെയും പിന്തുണച്ചവരെയും ഉന്നംവച്ച് മാത്യു കു‍ഴൽനാടന്‍റെ ഒളിയമ്പ്

ആറുമാസത്തിനിടെ അതിർത്തി മേഖലയിൽ അപകടത്തിൽ പെടുന്ന പതിനെട്ടാമത്തെ തൊഴിലാളി വാഹനമാണ് ഇത്. നെടുങ്കണ്ടം മേഖലയിലേക്ക് തൊഴിലാളികളുമായി എത്തിയ വാഹനമാണ് അപകടത്തിൽപ്പെട്ടത്.

News Summary: Five injured in vehicle accident involving workers in Nedumkandam, Idukki