യുണൈറ്റഡ് അറബ് എമിറേറ്റ്സിൽ (യുഎഇ) വധശിക്ഷയ്ക്ക് വിധിക്കപ്പെട്ടിരുന്ന ഇന്ത്യക്കാരിയുടെ വധശിക്ഷ നടപ്പാക്കിയതായി വിദേശകാര്യ മന്ത്രാലയം ഡൽഹി ഹൈക്കോടതിയെ അറിയിച്ചു. ഉത്തർപ്രദേശിലെ ബന്ദ ജില്ലയിൽ നിന്നുള്ള ഷഹ്സാദി ഖാന്റെ (34) വധശിക്ഷയാണ് നടപ്പാക്കിയത്. നാല് മാസം പ്രായമുള്ള കുഞ്ഞിനെ കൊലപ്പെടുത്തിയ കേസിൽ അബുദാബിയിൽ വധശിക്ഷയ്ക്ക് വിധിക്കപ്പെട്ടിരുന്നു.
യുഎഇയിലെ നിയമങ്ങളും ചട്ടങ്ങളും അനുസരിച്ച് 2025 ഫെബ്രുവരി 15 ന് ഷെഹ്സാദി ഖാന്റെ വധശിക്ഷ നടപ്പാക്കിയെന്ന് വിദേശകാര്യ മന്ത്രി കോടതിയെ അറിയിച്ചു. ഫെബ്രുവരി 28 ന് ഖാന്റെ വധശിക്ഷയെക്കുറിച്ച് യുഎഇയിലെ ഇന്ത്യൻ എംബസിക്ക് സർക്കാരിൽ നിന്ന് ഔദ്യോഗിക അറിയിപ്പ് ലഭിച്ചതായി അഡീഷണൽ സോളിസിറ്റർ ജനറൽ (എഎസ്ജി) ചേതൻ ശർമ്മ പറഞ്ഞു.
ALSO READ: മൂന്നാം തവണയും കേരളത്തിൽ കോൺഗ്രസ് തോൽക്കും; സുനില് കനുഗൊലുവിന്റെ റിപ്പോര്ട്ട് പുറത്ത്
“അധികൃതർ സാധ്യമായ എല്ലാ സഹായങ്ങളും നൽകുന്നുണ്ടെന്നും അവരുടെ സംസ്കാരം 2025 മാർച്ച് 5 ന് നടത്തുമെന്നും” അദ്ദേഹം കൂട്ടിച്ചേർത്തു.
മകളുടെ നിലവിലെ നിയമപരമായ നിലയും ക്ഷേമവും സംബന്ധിച്ച കൃത്യമായ വിവരങ്ങൾ ലഭിക്കണമെന്ന് ആവശ്യപ്പെട്ട് ഖാന്റെ പിതാവ് ഷബീർ ഖാൻ കോടതിയെ സമീപിച്ചതിനെ തുടർന്നാണ് ഇത്.
2021 ഡിസംബറിൽ ആണ് ഷഹ്സാദി ഖാൻ അബുദാബിയിൽ എത്തിയത്. 2022 ഓഗസ്റ്റിൽ, അവരുടെ തൊഴിലുടമയ്ക്ക് കുഞ്ഞുണ്ടായി. കുഞ്ഞിനെ നോക്കിയിരുന്നത് ഷഹ്സാദിയായിരുന്നു. പതിവ് പ്രതിരോധ കുത്തിവയ്പ്പുകൾ സ്വീകരിച്ച ശേഷം 2022 ഡിസംബർ 7 ന് കുഞ്ഞ് മരിച്ചു.
2023 ഡിസംബറിൽ കുഞ്ഞിന്റെ കൊലപാതകം ഖാൻ കുറ്റസമ്മതം നടത്തുന്നതായി കാണിക്കുന്ന ഒരു വീഡിയോ റെക്കോർഡിംഗും ഹർജിയിൽ പരാമർശിച്ചിട്ടുണ്ട്. എന്നാൽ അവളുടെ തൊഴിലുടമയും കുടുംബവും പീഡിപ്പിച്ചും ഭീഷണിപ്പെടുത്തിയുമാണ് കുറ്റസമ്മതം നടത്തിയതെന്ന് ഹർജിയിൽ അവകാശപ്പെട്ടു. കുഞ്ഞിന്റെ മാതാപിതാക്കൾ പോസ്റ്റ്മോർട്ടത്തിന് സമ്മതം നിഷേധിച്ചുവെന്നും മരണത്തിൽ കൂടുതൽ അന്വേഷണം ഒഴിവാക്കുന്നതിനുള്ള ഒരു കരാറിൽ ഒപ്പുവച്ചുവെന്നും അതിൽ അവകാശപ്പെട്ടു.
ഇന്ത്യൻ എംബസി തന്റെ മകൾക്ക് നിയമോപദേശം നൽകിയെങ്കിലും, കൊലപാതകം ഏറ്റുപറയാൻ അവളുടെ മേൽ സമ്മർദ്ദം ചെലുത്തി എന്നും മതിയായ പ്രാതിനിധ്യം നിഷേധിച്ചു എന്നും ഷഹ്സാദിയുടെ അച്ഛൻ ആരോപിച്ചു. 2023 സെപ്റ്റംബറിൽ ഖാന്റെ അപ്പീൽ തള്ളപ്പെട്ടു, 2024 ഫെബ്രുവരി 28 ന് വധശിക്ഷ ശരിവച്ചു.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
