റെസ്റ്റോറന്റിൽ പോകേണ്ട, പനീര്‍ ടിക്ക ഇനി വീട്ടിൽത്തന്നെ എളുപ്പത്തിലുണ്ടാക്കാം

പാലുത്പന്നങ്ങളിൽ പ്രധാനിയാണ് പനീർ. പ്രോട്ടീൻ, കാത്സ്യം, വൈറ്റമിൻ എന്നിങ്ങനെ പോഷക ഗുണങ്ങൾ നിറഞ്ഞ ഒന്നാണിത്. പനീർ ഉപയോ​ഗിച്ച് ഉണ്ടാക്കുന്ന വിഭവങ്ങളെല്ലാം ഏറെ രുചികരവുമാണ്. പനീർ കൊണ്ട് വളരെ എളുപ്പത്തിൽ ഒരു ടിക്ക തയ്യറാക്കിയാലോ, അതും റെസ്റ്റോറൻ്റിനെ വെല്ലുന്ന ടേസ്റ്റിൽത്തന്നെ.

ആവശ്യമായ ചേരുവകൾ

പനീർ – 200 ഗ്രാം
ഇഞ്ചി-വെളുത്തുള്ളി പേസ്റ്റ് – 1 ടേബിൾസ്പൂൺ
തൈര് – 2 ടേബിൾസ്പൂൺ
വെണ്ണ – 1 ടേബിൾസ്പൂൺ
മുളകുപൊടി – 2 ടീസ്പൂൺ .
കുരുമുളകുപൊടി – 1/2 ടീസ്പൂൺ
ഗരംമസാല – 2 ടീസ്പൂൺ
മഞ്ഞൾപൊടി – 1 നുള്ള്
ഉപ്പ് – ആവശ്യത്തിന്

Also Read: കൂൺ ഫ്രിഡ്ജില്‍ വെക്കുമ്പോൾ കേടാകുന്നതാണോ പ്രശ്നം? ഈ പൊടിക്കൈ അറിയാതെ പോകരുത്

തയ്യാറാക്കുന്ന വിധം

ആദ്യംതന്നെ പനീർ ചെറിയ കഷ്ണങ്ങളായി മുറിച്ച് വയ്ക്കുക. തൈരിലേക്ക് മുളകുപൊടി, കുരുമുളകുപൊടി, ഗരംമസാല, മഞ്ഞൾപൊടി, ഇഞ്ചി-വെളുത്തുള്ളി പേസ്റ്റ്, ഉപ്പ് എന്നിവ ചേർത്ത് നന്നായി യോജിപ്പിച്ച് പേസ്റ്റ് രൂപത്തിലാക്കുക. ഈ മിശ്രിതത്തിലേക്ക് പനീർ ഇട്ട് കുറഞ്ഞത് 20 മിനിറ്റ് വയ്ക്കുക. ശേഷം ഒരു നോൺ സ്റ്റിക്ക് പാനിൽ 1 ടേബിൾ സ്പൂൺ വെണ്ണ ചൂടാക്കി, അതിലേക്ക് പനീർ കഷ്ണങ്ങൾ ഓരോന്നായി ഇടാം. ചെറുതീയിൽ ഇരുവശവും ബ്രൗണ്‍ നിറമാകുന്നവരെ ഇത് മൊരിച്ചെടുത്താൽ കൊതിയൂറുന്ന പനീര്‍ ടിക്ക റെഡി.