ജനഹൃദയങ്ങളിൽ മരിക്കാത്ത ഇ കെ നായനാർ

കേരളത്തിനെ ഇന്ന് കാണുന്ന പോലെ പകപ്പെടുത്തുന്നതിൽ പ്രധാന പങ്കുവഹിച്ച ഇടതുപക്ഷ സർക്കാരുകളിൽ ജനപ്രിയ മുഖ്യമന്ത്രിമാരിൽ ഒരാൾ. ദൃഢതയുള്ള ആശയങ്ങൾ കൃത്യതയോടെ ഹാസ്യത്തിന്റെ മേമ്പൊടി കൂടെ ചേർത്ത് അവതരിപ്പിച്ച വ്യക്തി, ഇ കെ നായനാർ. കേരള ജനതയുടെ ജീവിതം പുതുക്കിപ്പണിത ജനഹൃദ്യങ്ങളിൽ ഇടമുള്ള കമ്മ്യൂണിസ്റ്റായിരുന്നു അദ്ദേഹം. അദ്ദേഹം മുഖ്യമന്ത്രിയായിരുന്ന കാലം കേരളത്തിന്‌ മറക്കാനാകാത്തതാണ്. രാജ്യത്ത് ആദ്യമായി കർഷക തൊഴിലാളികൾക്ക് പെൻഷൻ നൽകിയത് ഇ കെ നായനാരുടെ നേതൃത്വത്തിലുള്ള എൽ ഡി എഫ് സർക്കാരായിരുന്നു.

ഇന്ന് നാം എത്തി നിൽക്കുന്ന വികസനത്തിന്റെ പ്രധാന ചവിട്ടു പടികളെല്ലാം അദ്ദേഹത്തിന്റെ നേതൃത്വത്തിലുള്ള സർക്കാരുകൾ പണിതതായിരുന്നു. സാക്ഷരതയജ്ഞം, കുടുംബശ്രീ, ആദ്യ ഐ ടി പാർക്ക്, മാവേലി സ്റ്റോർ എന്നിങ്ങനെ എല്ലാം പ്രാവർത്തികമാകുന്നത് ഇ കെ നായനാർ മുഖമന്ത്രിയായിരിക്കെയാണ്. സാധാരണക്കാരന്റെ ശബ്ദമായിരുന്നു നായനാർക്ക്. ‘അത് നമുക്ക് ശരിയാക്കാടോ‘ എന്ന കണ്ണൂർ ശൈലിയിലുള്ള ആ ഉറപ്പ് ജനത്തിന് എന്നും ധൈര്യമായിരുന്നു.

മികച്ച പ്രസംഗികനും എഴുത്തുകാരനുമായ അദ്ദേഹം സി പി ഐ എം രൂപീകരണ കാലം മുതൽ കേന്ദ്രകമ്മിറ്റി അംഗം ആയിരുന്നു. നിരവധി വർഷക്കാലം സിപിഐഎം സംസ്ഥാന സെക്രട്ടറി, പൊളിറ്റ് ബ്യൂറോ അംഗം എന്നിങ്ങനെ വിവിധ തലങ്ങളിൽ പ്രവർത്തിച്ചു. സ്കൂൾ വിദ്യാർഥിയായിരിക്കെ തുടങ്ങിയതാണ് സഖാവ് നായനാരുടെ രാഷ്ട്രീയ പ്രവർത്തനം. ബാലസംഘത്തിലൂടെയായിരുന്നു അദ്ദേഹം കടന്ന് വന്നത്. കല്യാശേരി ഹയർ എലമെന്ററി സ്കൂളിൽ ദളിത് വിദ്യാർത്ഥി പ്രവേശനത്തിനായി സമരരംഗത്തിറങ്ങി. 1940 ലെ തൊഴിലാളി പണിമുടക്കിലൂടെ ആദ്യമായി ജയിലിൽ പോയി. പിന്നീട് മോറാഴ സമരം, കയ്യൂർ സമരം എന്നിങ്ങനെ കേരള ചരിത്രത്തിൽ ഒഴിച്ചുകൂടാനാകാത്ത ഏടുകളായ സമരങ്ങളുടെ മുഖ്യപങ്കാളിയായി.

ALSO READ:ചാണ്ടി ഉമ്മന് ലഭിക്കാത്ത പരിഗണന ജനീഷിന്; മന്ത്രിസഭയിൽ നിന്നും തഴഞ്ഞതിൽ കുടുംബത്തിനും കടുത്ത അതൃപ്തി

നിശ്ചയദാർഢ്യവും സൗമ്യമായ ചിരിയും ഭരണ മികവും കൈവിടാത്ത ഇടതു മൂല്യങ്ങളും കൊണ്ട് ജനഹൃദയങ്ങളിൽ ഇടം നേടിയ സഹൃദയനായ ഇ കെ നായനാർ വിടപറഞ്ഞിട്ട് 22 വർഷങ്ങൾക്കിപ്പുറവും മരിക്കാത്ത ഓർമയാണ്. അദ്ദേഹത്തിന്റെ ഓർമ്മകൾ ഇന്നും പ്രസക്തമാണ്. മെയ് 19 സഖാവ് നായനാർ ദിനം.