രാജാജിനഗറിൽ ബാങ്ക് മാനേജരായ ഭുവനേശ്വരിയെ (39) ഭർത്താവ് വെടിവെച്ചു കൊലപ്പെടുത്തിയ സംഭവം മാസങ്ങൾ നീണ്ട കൃത്യമായ ആസൂത്രണത്തിന്റെ ഫലമെന്ന് പോലീസ്. പ്രതിയായ സോഫ്റ്റ്വെയർ എഞ്ചിനീയർ ബാലമുരുകൻ (40) അതീവ ക്രൂരതയോടെയാണ് കൊലപാതകം നടപ്പിലാക്കിയത്. തോക്ക് ഉപയോഗിച്ച് കൊലപ്പെടുത്താനായിരുന്നു ആദ്യ പദ്ധതിയെങ്കിലും, അത് പരാജയപ്പെട്ടാൽ ഉപയോഗിക്കാനായി ഒരു കത്തിയും ഇയാൾ കരുതിയിരുന്നു.
നാല് മാസം മുമ്പ് തന്നെ ഭാര്യയെ വകവരുത്താൻ തീരുമാനിച്ച പ്രതി നിയമവിരുദ്ധമായി തോക്കും തിരകളും സംഘടിപ്പിച്ചിരുന്നു. വൈകുന്നേരം 6.30-ഓടെ തിരക്കേറിയ റോഡിൽ വെച്ച് ഭുവനേശ്വരിക്ക് നേരെ അഞ്ച് റൗണ്ട് വെടിയുതിർക്കുകയായിരുന്നു.
തോക്ക് ഏതെങ്കിലും കാരണവശാൽ പ്രവർത്തിക്കാതിരുന്നാൽ ഉപയോഗിക്കാനാണ് താൻ കത്തിയും കൈവശം വെച്ചതെന്ന് ഇയാൾ ചോദ്യം ചെയ്യലിൽ വെളിപ്പെടുത്തി. തനിക്ക് കിട്ടിയ അവസരം പാഴാക്കാൻ ആഗ്രഹിച്ചിരുന്നില്ലെന്നും, മരണം ഉറപ്പാക്കിയ ശേഷമാണ് താൻ മടങ്ങിയതെന്നും യാതൊരു കുറ്റബോധവുമില്ലാതെ ഇയാൾ പോലീസിനോട് പറഞ്ഞു.
2011-ൽ വിവാഹിതരായ ഇവർ തമ്മിൽ കഴിഞ്ഞ കുറച്ചു വർഷങ്ങളായി കടുത്ത കുടുംബകലഹം നിലനിന്നിരുന്നു. ഭുവനേശ്വരിക്ക് അവിഹിത ബന്ധമുണ്ടെന്ന സംശയത്തിൽ ബാലമുരുകൻ അവരെ നിരന്തരം പീഡിപ്പിച്ചിരുന്നതായി ബന്ധുക്കൾ പറഞ്ഞു.
ഭാര്യയെയും മക്കളെയും ഇയാൾ ക്രൂരമായി മർദ്ദിക്കാറുണ്ടായിരുന്നു. ചോദ്യം ചെയ്യലിനിടെ തികച്ചും ശാന്തനായി കാണപ്പെട്ട പ്രതി, തന്റെ ഭാര്യ ഇത് അർഹിച്ചിരുന്നതായാണ് ഉദ്യോഗസ്ഥരോട് പറഞ്ഞത്.
കൈരളി ന്യൂസ് വാട്സ്ആപ്പ് ചാനല് ഫോളോ ചെയ്യാന് ഇവിടെ ക്ലിക്ക് ചെയ്യുക
Click Here
